Пасля заявы Польшчы аб закрыцці мяжы з Беларуссю значна выраслі чэргі ў пунктах пропуску Брэст і Казловічы

9 верасня, Позірк. Пасля заявы Польшчы аб закрыцці ў ноч на 12 верасня мяжы з Беларуссю значна выраслі чэргі ў пунктах пропуску Брэст і Казловічы, сведчыць праведзены “Позіркам“ параўнальны аналіз аператыўнай інфармацыі Дзяржаўнага памежнага камітэта.

Колькасць грузавых аўтамабіляў, якія чакаюць выезду ў Польшчу праз Казловічы, у другой палове дня 9 верасня ўзрасла ў 1,8 раза — з 205 у 16 гадзін да 370 у 22 гадзіны.

У пункце пропуску Брэст легкавых аўтамабіляў на выезд стала больш на 23% — з 1.035 у 16 гадзін да 1.270 у 22 гадзіны. Зноў з’явілася чарга аўтобусаў, якой не было ў 14 і 16 гадзін. У 22 гадзіны выезду чакала 4 аўтобусы.

У пунктах пропуску на беларуска-літоўскай (Каменны Лог, Беняконі) і беларуска-латвійскай мяжы (Грыгароўшчына) змяненняў практычна не адбылося. У Каменным Логу да 22 гадзін утварылася чарга з 10 легкавых аўтамабіляў. З пачатку сутак да 20 гадзін чаргі не было. У Грыгароўшчыне чэргаў няма з 4 гадзін раніцы 31 жніўня (з 1 лістапада 2024 года па Латвіі забаронена перасоўвацца на аўтамабілях з беларускімі нумарамі; у Літву з 14 лютага 2025 года можна ўязджаць на аўтамабілях з беларускай рэгістрацыяй пры наяўнасці літоўскай візы або дазволу на жыхарства ў Літве).

Гл. таксама па тэме:

Граница на замке. Польша наносит удар под дых Лукашенко, но и обычным белорусам светит ад (на рускай мове)