Два чалавекі загінула ў аўтамабільнай аварыі на поўдні Беларусі

15 ліпеня, Позірк. Два чалавекі загінула ў выніку дарожна-транспартнага здарэння позна ўвечары 14 ліпеня ў Жыткавіцкім раёне (Гомельская вобласць), паведаміла прэс-служба Міністэрства ўнутраных спраў.

Аварыя адбылася каля апоўначы паміж раённым цэнтрам і Давыд-Гарадком (Столінскі раён Брэсцкай вобласці) — на трасе Р-88 (Жыткавічы — Давыд-Гарадок — мяжа Украіны).

Паводле папярэдняй інфармацыі, BMW з 29-гадовым кіроўцам за стырном сутыкнуўся з грузавіком ЗІЛ, які рухаўся ў спадарожным напрамку. Кіроўца легкавога аўтамабіля і яго 18-гадовы пасажыр памерлі, яшчэ двое тых, хто быў у салоне (29 і 30 гадоў), шпіталізаваныя, пра іх стан не паведамляецца.

Адзначаецца, што на месцы здарэння працавалі супрацоўнікі Дзяржаўтаінспекцыі, МНС, а таксама медыкі і следча-аператыўная група. Высвятляюцца прычыны і абставіны аварыі.