Ціханоўская і Зурабішвілі абмеркавалі сумесныя дзеянні, умяшальніцтва Расіі ў справы Грузіі

16 лютага, Позірк. Сітуацыю ў рэгіёне, умяшальніцтва Расіі ў справы Грузіі, а таксама сумесныя дзеянні на міжнароднай арэне, у тым ліку ў ПАСЕ і Еўрапейскім парламенце, абмеркавалі на сваёй першай сустрэчы Святлана Ціханоўская і пяты прэзідэнт Грузіі Саламэ Зурабішвілі. Перамовы адбыліся 16 лютага ў рамках Мюнхенскай міжнароднай канферэнцыі па бяспецы.

Як паведаміў “Позірку” галоўны дарадца беларускага дэмакратычнага лідара Франак Вячорка, Ціханоўская выказала падтрымку грузінскаму народу, які змагаецца за еўрапейскую будучыню сваёй краіны.

“Асобна абмеркавалі магчымыя сцэнары развіцця падзей у Беларусі і Грузіі, а таксама супрацоўніцтва з новай адміністрацыяй ЗША”, — сказаў Вячорка.

Ён працытаваў Ціханоўскую пасля сустрэчы: “Я была рада сустрэцца з прэзідэнтам Зурабішвілі, перадала ёй словы падтрымкі, салідарнасці і падзякі. Яна неаднаразова выказвалася ў падтрымку беларусаў, гаварыла пра нас нават з трыбуны ААН. Грузінскі народ, як і беларусы, заслугоўвае свабоды, павагі і еўрапейскай будучыні без прыгнёту”.

“Саламэ Зурабішвілі рашуча настроена на барацьбу за еўрапейскую будучыню сваёй краіны”, — дадала Ціханоўская.

Гл. таксама па тэме:

Ціханоўская ўпершыню сустрэнецца з Зурабішвілі

Паводле беларускіх лякал. Грузінскі тэлеканал абвінаваціў “рэжым Іванішвілі” ў выкарыстанні паслуг “інструктараў Лукашэнкі”