Аддзел навін 26 жніўня 2024, 17:01

Заробак айцішнікаў у ліпені — адзін з самых нізкіх у 2024 годзе

Белстат палічыў сярэдні заробак за ліпень (да выплаты падаткаў) у розных галінах, у тым ліку ў ІТ.

У мінулым месяцы сярэдні заробак у ІТ склаў 6808,2 рубля. За год (ад ліпеня 2023) ён павялічыўся нязначна — усяго на 2,4%, вынікае са звестак Белстата.

Між тым сёлета ліпеньскі заробак айцішнікаў — адзін з самых нізкіх. Меншым ён быў толькі ў чэрвені — 6762,6 рубля. З іншага боку, якраз у ліпені перапынілася тэндэнцыя зніжэння заробкаў, якая назіралася апошнія некалькі месяцаў (ад красавіка).

Падобная сітуацыя з сярэднім заробкам у ІТ у валюце.

За ліпень заробак (па сярэднім афіцыйным курсе Нацбанка за месяц) склаў 2143,4 долара. Гэта на 2,4% менш, чым у ліпені мінулага года.

У бягучым годзе гэта таксама адзін з самых нізкіх сярэдніх заробкаў. Антырэкорд быў усталяваны ў чэрвені — 2121,1 долара. Да гэтага самы нізкі заробак сёлета быў у красавіку (2158,8 долара), потым у маі (2148,6 долара).

Паводле звестак афіцыйнай статыстыкі, агулам у Беларусі сярэдні заробак за ліпень склаў 2355,1 рубля. У параўнанні з ліпенем мінулага года заробак вырас амаль на 22%.

Пры гэтым сярэдні заробак айцішнікаў выявіўся амаль у 3 разы вышэйшым за сярэдні заробак у краіне.