«Можам дасягнуць $4,5 млн». Каманда з Беларусі робіць «Яндэкс Таксі» для пяску і друзу

Ідэя Kliffort — мабільнай праграмы, праз якую можна заказаць любыя сыпкія будматэрыялы, — належыць самому Ціму. У распрацоўшчыка ёсць лецішча — і ён неаднаразова сутыкаўся з праблемай заказаць і прывезці туды пясок, друз і штосьці яшчэ. «Кошт дастаўкі быў празмерным». 

Абмеркаваўшы гэта са знаёмымі, што працуюць у будаўнічай сферы (дарэчы, Цім і сам нейкі час падпрацоўваў на будоўлі), маладзён зразумеў: на рынку відавочна ёсць праблема, якую можна і трэба вырашаць. Так і з’явілася ідэя стварыць маркетплэйс па дастаўцы сыпкіх будаўнічых матэрыялаў. 

Цім адзначае, што падобнай платформы няма не толькі ў Беларусі, але і ў іншых краінах СНД: «Мы — першапраходцы ў гэтай сферы». І дадае, што і сам рынак сыпкіх будматэрыялаў «вельмі недаацэнены».

Асноўная мэтавая аўдыторыя Kliffort — гэта фізічныя асобы і ІП (пазней плануюцца і юрыдычныя асобы), для якіх купіць той жа друз на ўчастак — «гэта боль: бо даводзіцца абзвоньваць дзясяткі кампаній, каб заказаць дастаўку — а на тым канцы слухаўкі цябе часам ледзь не пасылаюць».

— А яшчэ розныя кампаніі часта называюць розныя цэны, і яны адрозніваюцца ў разы. І каб знайсці аптымальную прапанову, табе трэба правесці не гадзіну і не дзве на тэлефоне.

Здавалася б, праблему можна было вырашыць з дапамогай самога вытворцы або прадаўца, ну або заказаць «Яндэкс Дастаўку» — балазе яны ажыццяўляюць перавозку грузаў. Але ў першых «усё дрэнна з лагістыкай», — кажа Цім, а ў другіх няма тых жа самазвалаў.

— Самая галоўная нашая перавага палягае ў тым, што да нашай платформы падключаныя буйныя пастаўшчыкі і перавозчыкі. Заказаць паслугу ў іх непасрэдна вельмі складана, бо ў асноўным гэта дзяржкампаніі, таму там вельмі шмат бюракратыі. Але мы змаглі ўкласці ўгоду з вельмі буйным кар’ерам у Гомелі, а потым і з іншымі.

У нас прадуманая сістэма лагістыкі. Дзякуючы ёй мы прыцягваем на платформу пастаўшчыкоў і перавозчыкаў — так што ў нас, можна сказаць, маркетплэйс: за пару хвілін чалавек можа заказаць сабе на ўчастак пясок і іншыя сыпкія матэрыялы.

«Прабіцца да менеджменту „Яндэкса“ было не проста»

Распрацоўшчык адзначае, што ён праводзіў паўнавартаснае даследаванне рынку, і можа з упэўненасцю сцвярджаць, што ён «суперперспектыўны».

— Рынак сыпкіх будаўнічых матэрыялаў расце нягледзячы на крызіс. За 2024 год у Беларусі ён ацэньваецца ў $450 млн. А значыць мы, як маладая кампанія, можам дасягнуць $4,5 млн на працягу трох гадоў пры належным аб’ёме інвестыцый.

— Вызначальны фактар, які дазволіць нам маштабавацца — гэта электронны дакументаабарот. Дзяржавы, у тым ліку і нашая, імкнуцца перавесці ўсіх на электронныя накладныя — і ўжо да 2026 года большасць кампаній будзе абавязаная выкарыстоўваць толькі іх. 

Каманда дамовілася аб інтэграцыі «Яндэкс Карт» у сваю праграму, дзеліцца наш суразмоўца.

— Таксама мы прыйшлі да дамоўленасцяў па стварэнні нашай навігацыйнай сістэмы на аснове бібліятэк «Яндэкса» — яны будуць нас суправаджаць. І ў выніку ў нас будзе навігацыя падобная да «Яндэкс Таксі»: то-бок карыстальнік зможа ў рэальным часе бачыць, дзе едзе яго грузавік і праз колькі будзе (паверце, гэта вельмі важна, так як праблема тэрмінаў дастаўкі стаіць таксама вельмі востра — часта заказчык не ведае дакладна, калі прыедзе матэрыял). 

Цім прызнаецца, прабіцца да менеджменту «Яндэкса» было няпроста, дый самі перамовы расцягнуліся на паўгода. Але ў выніку ўсё атрымалася. Дамаўляцца з кар’ерамі — таксама задача не з простых. Але калі самы буйны пагадзіўся на супрацоўніцтва, справа пайшла і з астатнімі.

Цім кажа, яны зрабілі тры розныя мабільныя праграмы — для заказчыка, для перавозчыка і для кар’ера. Праграмы распрацаваныя пад iOs і Android, каманда рыхтуе дакументы, каб апублікаваць у Apple Store і Google Play. Таксама распрацоўшчыкі дарабляюць сайт.

Працуе над Kliffort 10 чалавек. Пяць з іх — супрацоўнікі EPAM, усе сеньёры. Ёсць таксама сістэмны архітэктар, ён працаваў над e-dostavka. Частка каманды працуе фул-тайм, частка — парт-тайм. Усе ў розных гарадах Беларусі, а адзін чалавек — у Грузіі. Дарэчы, у CTO стартапа ў мінулым была свая будаўнічая кампанія, «так што ён глыбока ў тэме». 

Як Цім сабраў іх разам — «дзякуючы нэтворкінгу: запітчыў сябрам-айцішнікам сваю ідэю, — і яны паверылі ў прадукт, бо перспектывы росту ў яго каласальныя».

— Але я б хацеў абмовіцца, што нашая мэта — не зарабіць грошы, а закрыць боль, — дадае Цім. — Мы не проста робім зручную праграму, але і дзякуючы аптымізацыі лагістыкі зніжаем кошт дастаўкі. Выкарыстоўваючы матэматычны алгарытм, прапаноўваем нашаму пакупніку найбліжэйшы кар’ер. 

Улетку каманда падалася на ўдзел у стартап-марафоне ад «Белаграпрамбанка» — распрацоўшчыкі прайшлі адбор са 100 каманд і трапілі ў фінал (у ім 20 кампаній, якія змагаюцца ў розных намінацыях), заключны этап конкурсу прызначаны на 23 лістапада. На коне прыз ад банка ў $6000. 

— Але што яшчэ нас прыцягнула: у фінале мы будзем выступаць перад інвестарамі — і для нас шанец звярнуць на сябе дадатковую іх увагу.

Таксама каманда бярэ ўдзел у конкурсе ад венчурнай студыі Spark — і тут яны таксама ў фінале.

«Рэсурсаў было мала»

Не так даўно Kliffort выканалі першы заказ у тэставым рэжыме — на дастаўку 10 тон друзу на адлегласць у 20 км. Заказчык спампаваў праграму — і праз яе ўсё аформіў.

А яшчэ стартаперы сабралі дакументы на стварэнне юрыдычнай асобы і плануюць стаць рэзідэнтамі тэхнапарка «Карал» у Гомелі. Чаму не ў Мінску, Цім адказвае так: «Гэта для нашай нішы адзін з найлепшых гарадоў. Тут канцэнтрацыя кар’ераў высокая, і стартаваць тут прасцей». 

У будучыні каманда плануе спецыялізавацца і на дастаўцы буйнагабарытных будаўнічых матэрыялаў.

— Цяпер прадпрыемствы, якія вырабляюць, напрыклад, газасілікатныя блокі (з іх у асноўным будуюць дамы ў Беларусі), не аказваюць паслуг па дастаўцы, — тлумачыць распрацоўшчык. — У выніку заказчыку даводзіцца шукаць кіроўцу на маніпулятары і дамаўляцца, каб ён прывёз яму матэрыялы. Мы маем намер гэта аўтаматызаваць, каб зрабіць заказ максімальна зручным. 

Мы спыталі ў Ціма, якія выдаткі на распрацоўку Kliffort. Ён ацаніў іх у $10+ тысяч з асабістых сродкаў.

— Рэсурсаў было мала, — прызнаецца распрацоўшчык, — але крок за крокам перад намі адчыняліся новыя дзверы.

«Пашпарт меў значэнне толькі на пачатку вайны». Фаўндарка CactusSoft запусціла ў Даніі стартап — ён вымярае ціск па сэлфі

Па тэме

«Пашпарт меў значэнне толькі на пачатку вайны». Фаўндарка CactusSoft запусціла ў Даніі стартап — ён вымярае ціск па сэлфі