EPAM звольніць частку каманды ў Беларусі. «Цяжкае рашэнне»

Камандзе паведамілі пра скарачэнні сёння на анлайн-мітынгу. Усім, хто трапіў пад скарачэнне, абяцалі даслаць паведамляльны ліст на працягу працоўнага дня.

Вось што dev.by расказаў адзін з супрацоўнікаў:

— Крытэраў [выбару супрацоўнікаў], якія патрапяць пад скарачэнне, не агучылі. Але ўсім звольненым выплацяць выходную дапамогу ў адпаведнасці з заканадаўствам. 

Паводле слоў крыніц, кампанія патлумачыла, што вымушаная пайсці на скарачэнні, каб аптымізаваць выдаткі. Ва ўмовах складанай геапалітычнай абстаноўкі, эканамічнага крызісу і скарачэння бюджэтаў заказчыкамі EPAM не можа забяспечыць працай усіх супрацоўнікаў. 

Дакладная колькасць супрацоўнікаў, якіх кампанія звольніць, невядомая. Паводле слоў адной з крыніц, «калі 2%, то скарачэнне закране не менш за 100 чалавек». 

Паводле інфармацыі dev.by, у беларускім EPAM на канец 2022 года працавалі 6000+ чалавек, з іх вытворчых спецыялістаў — 4500+. Па колькасці супрацоўнікаў беларускі офіс (найбуйнейшы да 2022 года) ужо прайграе ўкраінскаму, польскаму і індыйскаму.

Што кажуць у EPAM

Мы звярнуліся па каментар у EPAM. У кампаніі рашэнне пацвердзілі. 

— Скарачэнне каманды ў Беларусі — гэта цяжкае, але неабходнае і адказнае рашэнне. Яно стала аб’ектыўным адлюстраваннем эканамічнай сітуацыі на глабальным рынку кліентаў за апошнія 12-18 месяцаў. Супрацоўнікі, якіх гэтае рашэнне закранула, атрымаюць усе прадугледжаныя заканадаўствам выходныя дапамогі і падтрымку кампаніі.

EPAM у Беларусі

Да 2022 года ў Беларусі ў EPAM быў найбуйнейшы офіс — там працавала 10 000+ спецыялістаў. Але толькі за мінулы год беларуская каманда, уключаючы вытворчых спецыялістаў, скарацілася ў два разы. 

Шмат у чым гэта звязана з рэлакацыяй супрацоўнікаў праз вайну ва Украіне і наступствамі санкцый у дачыненні да Беларусі.

Пры гэтым кіраўнік кампаніі Аркадзь Добкін неаднаразова адзначаў, што EPAM не плануе закрываць бізнэсу і сыходзіць з Беларусі.

Вось што ён сказаў dev.by пра планы датычна Беларусі вясной 2022 года:

«На сённяшні дзень пазіцыя кампаніі па Беларусі не змянілася. Пакуль ёсць таленты і кліенты. Іншая рэч, што дынаміка, у параўнанні з сітуацыяй два месяцы таму, і шэсць месяцаў таму, і год таму адназначна зусім не станоўчая. Гэта відавочна, і ні для кога даўно не сакрэт. Мы гаварылі пра нарастаючыя рызыкі тады і, на жаль, можам толькі паўтарыць, што цяпер яны вельмі высокія, хоць яшчэ пакуль ёсць надзея, што краіна пазбегне ўдзелу ў вайне, і гэта ў цяперашні момант самае галоўнае. І для людзей, і для кліентаў, і для кампаніі ў цэлым».

У сваіх справаздачах для камісіі па каштоўных паперах і біржах ЗША EPAM таксама закранае рызыкі вядзення бізнэсу ў Беларусі ў сувязі з вайной ва Украіне.

У прыватнасці, паводле даных кампаніі, летась шэраг заказчыкаў адмовіўся працаваць з айцішнікамі ў Беларусі. Праз гэта скараціўся партфель праектаў у РБ, а кампаніі давялося рэлакаваць асобныя каманды. EPAM асцерагаецца паўтарэння такога сцэнара з дзейнымі кліентамі. Кампанія ацэньвае рызыкі, звязаныя з прыпыненнем або адмовай кліентаў ад дзейных праектаў, альбо скарачэннем кошту кантрактаў. Гэта таксама можа негатыўна адбіцца на бізнэсе, заяўляюць у EPAM.

Скарачэнні ў EPAM паўплывалі на сталічны рынак офіснай нерухомасці. 

За 2021–2022 гады кампанія вызваліла каля 80 тысяч кв. метраў офісных плошчаў у 5+ бізнэс-цэнтрах, або амаль 70% ад займаных офісаў. Часткова паўплывала пандэмія, часткова — скарачэнне каманды ў Беларусі.

У Мінску ў EPAM цяпер ёсць будынак на вул. Купрэвіча, у які кампанія пераехала ў 2015 годзе. Уласнікам яшчэ аднаго — бізнэс-цэнтра «Клевер Парк», які будавала ізраільская Fishman Group, — яна стала на пачатку 2020 года.

Адначасова працягваюць скарачацца актывы EPAM у Беларусі. На канец чэрвеня гэтага года кошт актываў складаў 53,5 мільёна долараў. За паўгода кошт знізіўся амаль на 4 мільёны долараў, а за апошнія паўтара года — на 20+ мільёнаў долараў. У 2020–2021 гадах сума ўсіх актываў EPAM у Беларусі вагалася ў межах 75-78 мільёнаў долараў.