Беларусь падскочыла ў глабальным рэйтынгу валодання англійскай
Міжнародны адукацыйны цэнтр EF Education First абнавіў найбуйнейшы ў свеце рэйтынг краін па ўзроўні валодання англійскай мовай. Сёлета Беларусь заняла ў ім 33 месца са 113 — плюс шэсць пазіцый у параўнанні з 2022-м. Тады нашая краіна была на 39 месцы са 111.
Аўтары спіса падзяляюць краіны на пяць груп: з вельмі высокімі, высокімі, сярэднімі, нізкімі і вельмі нізкімі навыкамі англійскай. Беларусь ідзе ў сярэдняй групе з вынікам 539 балаў (што на 6 больш, ніж год таму) пры сярэднесусветных 502. У Еўропе мы па-ранейшаму займаем 24 месца з 34. Беларусь саступае Польшчы (13 месца) і Літве (21) — яны ў групе з высокім паказчыкам валодання англійскай, а таксама Грузіі (32).
У спісе гарадоў Мінск набраў 549 балаў, Тбілісі — 551, Варшава — 605, Вільня — 610. У Мінскай вобласці беларусы знаюць англійскую лепш за ўсё, а вось сярод даследаваных гарадоў па краіне лідзіруе Гродна — 551 бал.
Найлепшымі сярод краін і гарадоў застаюцца Нідэрланды і Амстэрдам — 647 і 646 балаў адпаведна.
Рэлацыраваліся? Цяпер вы можаце каментаваць без верыфікацыі акаўнта.