Крыгер вызвалены ў рамках міжнароднага абмену зняволенымі — СМІ

1 жніўня, Позірк. Прыгавораны ў Беларусі да смяротнага пакарання і затым памілаваны Аляксандрам Лукашэнкам грамадзянін Германіі Рыка Крыгер вызвалены ў рамках праведзенага паміж Расіяй, ЗША, Германіяй і Беларуссю найбуйнейшага за многія гады абмену зняволенымі, паведамляе The Insider.

Пачатак абменнага працэсу амерыканскім СМІ пацвердзілі ў Белым доме. Паводле звестак The Insider, з расійскіх турмаў адпусцілі двух грамадзян ЗША — карэспандэнта The Wall Street Journal Эвана Гершковіча і былога марскога пяхотніка Пола Уілана. Абодва былі асуджаныя на 16 гадоў пазбаўлення волі.

Акрамя таго, чакаецца, што з калоній і ізалятараў выйдзе шэраг расійскіх палітвязняў: Уладзімір Кара-Мурза, Лілія Чанышава, Ілля Яшын, Ксенія Фадзеева, Андрэй Півавараў, Алсу Курмашава, Алег Арлоў, Аляксандра Скачыленка, Дытэр Варонін, Кевін Лік, Герман Мойжэс, Вадзім Астанін, а таксама грамадзянін Германіі Патрык Шобель.

У абмен Масква павінна атрымаць расіян, асуджаных у ЗША і Еўрасаюзе. Сярод іх Вадзім Красікаў, які атрымаў у Германіі пажыццёвы тэрмін за забойства; прызнаныя вінаватымі ў шпіянажы Арцём і Ганна Дульцавы, якія адбывалі пакаранне ў Славеніі, а таксама Міхаіл Мікушын, Павел Рубцоў, Раман Селязнёў, Уладзіслаў Клюшын, Вадзім Канашчонак.

Турэцкі тэлеканал NTV перадаў кадры з аэрапорта Анкары, дзе прызямліўся расійскі самалёт. Мясцовыя журналісты паведамілі ў жывым эфіры, што ў абмене ўдзельнічаюць 26 чалавек.