Коўл станоўча адказаў на пытанне, ці можна спадзявацца на хуткае вызваленне палітвязняў

16 жніўня, Позірк. Спецпрадстаўнік прэзідэнта ЗША Дональда Трампа па Беларусі Джон Коўл адказаў кароткім “так“ на пытанне карыстальніка сацыяльнай сеткі Х Яны Кавалёвай: “Паважаны сп. Коўл, ці можам мы спадзявацца на вызваленне палітвязняў у найбліжэйшай будучыні?“

Завочны дыялог адбыўся ў ноч на 16 жніўня.

26 ліпеня Кавалёва звярнулася да Коўла з просьбай дапамагчы ейнаму брату Іллі Верамееву і “ўсім палітвязням у Беларусі“. Адрасат не адрэагаваў (Верамееў у жніўні 2022 года быў прыгавораны да 6,5 года пазбаўлення волі за паведамленні ў тэлеграм-чатах, якія сталі рэакцыяй на поўнамаштабнае ўварванне Расіі ва Украіну; на момант затрымання яму было 18 гадоў; паводле звестак праваабаронцаў, цяпер утрымліваецца ў штрафным ізалятары).

Падобны адмен паведамленнямі адбыўся 21 чэрвеня паміж Коўлам і лідарам беларускіх дэмсілаў Святланай Ціханоўскай пасля вызвалення пры садзейнічанні ЗША і вывазу з Беларусі групы палітвязняў, у тым ліку Сяргея Ціханоўскага. “Год таму я абняла свайго любімага мужа пасля пяці доўгіх гадоў расстання. Я хачу, каб сям’я кожнага палітвязня ў Беларусі адчула такую ж радасць“, — напісала палітык. Коўл адказаў: “Іх будзе яшчэ больш!“

1 ліпеня спецпрадстаўнік адрэагаваў словам “згодны” на пост заснавальніка Агенцтва еўраатлантычнага супрацоўніцтва, былога дыпламата Валера Кавалеўскага, які пазітыўна адгукнуўся на памілаванне Аляксандрам Лукашэнкам 28 палітвязняў да Дня Незалежнасці 3 ліпеня. “У чарговы раз пашыраецца прастора для магчымага, пераадольваючы меркаванне пра немагчымае, — заявіў Кавалеўскі. — Мы працягваем працу па вызваленні ўсіх палітвязняў і спыненні крымінальнага пераследу з палітычных матываў у Беларусі. Для паскарэння прагрэсу ў гэтай працы вельмі важна, каб дыпламатычныя намаганні ЗША, цвёрда і настойліва ўзначаленыя спецыяльным пасланнікам Джонам Коўлам і намеснікам памочніка дзяржсакратара Крысам Смітам (пакідае пасаду. — “Позірк“.), у супрацоўніцтве з Мінскам, падтрымліваліся еўрапейскімі краінамі“.

Ціханоўская ў апошнім інтэрв’ю медыякампаніі “Нямецкая хваля“ (Deutsche Welle, DW) заявіла, што перамовы паміж ЗША і беларускімі ўладамі аб вызваленні палітвязняў працягваюцца. Паводле яе слоў, у дэмсіл наладжаная “пастаянная камунікацыя з амерыканскім бокам”. Палітык параіла чытаць старонкі Коўла ў сацыяльных сетках.

Апошні раз Коўл быў у Мінску ў сакавіку. Вынікам стала вызваленне 250 палітвязняў, з якіх толькі 15 было выслана за мяжу, як гэта было з усімі астатнімі, каго выпускалі па выніках перамоваў з Вашынгтонам (за выключэннем Мікалая Статкевіча). Узамен ЗША скасавалі некаторыя санкцыі ў дачыненні да Беларусі.

28 красавіка на беларуска-польскай мяжы адбыўся шматбаковы абмен “5 на 5“. Сярод вызваленых быў палітвязень, беларускі журналіст польскага паходжання Анджэй Пачобут.

У той жа дзень на прэс-канферэнцыі ў Варшаве Коўл анансаваў чарговую паездку ў Беларусь “праз два-тры тыдні“ і падкрэсліў, што ЗША нацэленыя на вызваленне ўсіх палітвязняў у Беларусі. Візіт дагэтуль не адбыўся.

Лукашэнка неаднаразова заяўляў пра гатоўнасць заключыць “вялікую ўгоду” з Вашынгтонам. Упершыню ён пра гэта распавёў 14 кастрычніка 2025 года на нарадзе па пытаннях глабальнай міжнароднай абстаноўкі і развіцці беларуска-амерыканскіх стасункаў.

Сёлета 20 сакавіка, распавядаючы сваім прапагандыстам пра перамовы з амерыканцамі, Лукашэнка зноў казаў пра “вялікую ўгоду“ з ЗША: “Мы гатовыя, Дональд прапануе вялікую ўгоду і сустрэцца. Аж да таго, што ў яго дома, у Фларыдзе, і дамовіцца”.

30 сакавіка Трамп заявіў, што чакае сустрэчы з Лукашэнкам на другім пасяджэнні Савета міру. На першае ў лютым той не паехаў.

28 ліпеня на сустрэчы з пастаянным прадстаўніком Беларусі ў арганізацыі Аб’яднаных Нацый Валянцінам Рыбаковым Лукашэнка назваў “нядрэннымі” дынаміку і перспектывы беларуска-амерыканскіх стасункаў.

Рыбакоў паведаміў, што ягоныя “сустрэчы са спадаром Коўлам“ праходзяць “фактычна раз на 7-10 дзён“, з “іншымі прадстаўнікамі амерыканскага боку“ — “па неабходнасці”.

“Мы абмяркоўваем тыя пытанні, якія можам вырашыць у двухбаковых стасунках, наступныя крокі, якія абодва бакі могуць і павінны зрабіць пасля яго папярэдняга візіту“, — адзначыў дыпламат.

“Магчыма, гаворка пойдзе пра нейкія наступныя візіты, цяпер не буду агучваць канкрэтныя рэчы або даты“, — дадаў ён.

Паводле слоў Рыбакова, некалькі дзён таму на адрас Лукашэнкі “былі сфармуляваныя чарговыя пэўныя прапановы з боку ЗША”. Той “даў адпаведныя даручэнні тым структурам, якія займаюцца рэалізацыяй гэтых прапаноў (у час і пры ўмове, калі яны будуць рэалізаваныя)“.

Пастаянны прадстаўнік адзначыў, што праз некалькі дзён плануе вярнуцца ў Нью-Ёрк і сустрэцца з Коўлам, якому будзе перададзена пасланне Лукашэнкі.

Гл. таксама:

Американский трек Лукашенко: Трамп мне друг, но диктатура дороже (на рускай мове)