Сума наяўных грошай у абароце за першы квартал 2026 года павялічылася на 803,7 млн рублёў — Нацбанк

14 красавіка, Позірк. Сума наяўных грошай у абароце (агрэгат М0) на 1 красавіка 2026 года склала 15 млрд 285,1 млн рублёў, павялічыўшыся за месяц на 238,6 млн (на 1 сакавіка — 15 млрд 46,5 млн; +1,6%), з пачатку года — на 803,7 млн (на 1 студзеня — 14 млрд 481,4 млн; +5,5%), сведчаць звесткі Нацыянальнага банка.

Пераводныя дэпазіты за месяц зменшыліся на 1,1% (з 20 млрд 213,9 млн да 19 млрд 990,3 млн), з пачатку года — знізіліся на 4,3% (на 1 студзеня было 20 млрд 890,1 млн).

Наяўныя грошы ў абароце і пераводныя дэпазіты ў нацыянальнай валюце (М1) за сакавік павялічыліся на 0,04% (з 35 млрд 260,4 млн да 35 млрд 275,4 млн).

Грашовая маса ў нацыянальным вымярэнні (М2) вырасла з 65 млрд 214,2 млн да 65 млрд 756,1 млн (+0,8%), рублёвая грашовая маса (М2*) — з 67 млрд 943,2 млн да 68 млрд 717,6 млн (+1,1%), шырокая грашовая маса (М3) — з 102 млрд 865,3 млн да 104 млрд 813,2 млн (+1,9%).

За 2025 год агрэгат М0 вырас на 22,1% (за 2024-ы — на 25,1%, 2023-ы — 37,4%), М1 — на 20,4% (на 19,9% і 33,9% адпаведна), М2 — на 24,2% (на 34,3% і 29,8%), М2* — на 25,1% (на 28,6% і 34,7%), М3 — на 16,1% (на 17,3% і 23,6%).

Рэгулятар будзе прымаць меры макрапрудэнцыяльнага характару “для стымулявання інвестыцыйнага крэдытавання і — пры неабходнасці — астуджэння залішняга спажывецкага попыту, арыентаванага на імпарт“, заявіў старшыня праўлення НБ Раман Галоўчанка 21 сакавіка 2025 года на сустрэчы з прадстаўнікамі банкаўскага сектара.

Нацыянальны банк з 1 студзеня 2026 года памяняў пералік фінансавых інструментаў, па якіх устанаўліваюцца значэнні разліковых велічынь стандартнай рызыкі (РВСР).

З 1 красавіка яны зніжаныя:

– па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання ад аднаго да трох гадоў — 14,14% гадавых (было 14,34%; -0,2 адсоткавага пункта);

– па новых тэрміновых безадзыўных банкаўскіх укладах (дэпазітах) фізічных асоб у рублях з тэрмінам вяртання больш за тры гады — 15,31% гадавых (15,62%; -0,31 п. п.);

– для новых крэдытаў, прадастаўленых фізічным асобам (за выключэннем ільготных), — 18,26% (18,49%; -0,23 п. п.);

– для новых крэдытаў, прадастаўленых юрыдычным асобам (за выключэннем ільготных, інвестыцыйных), — 12,8% (12,91%; -0,11 п. п.);

– для новых інвестыцыйных крэдытаў, прадастаўленых юрыдычным асобам (за выключэннем ільготных) стаўка засталася без змен — 11,8%.

“Мы распачалі і паставілі задачу перад банкаўскай сістэмай па далейшаму павышэнню ашчаднай актыўнасці насельніцтва, — заявіў дзяржсмі Галоўчанка. — Па падаўжэнні тэрмінаў размяшчэння ўкладаў атрымалі добры водгук — другі месяц мы фіксуем рост дэпазітаў і не толькі на тэрмін ад года да трох, але і звыш трох гадоў ужо фактычна”.

Паводле яго слоў, усе банкі сфармавалі “прывабныя дэпазітныя прадукты на тэрмін звыш трох гадоў”.