Ва Украіне затрыманы “двайны агент”, які працаваў на спецслужбы РФ і Беларусі — СБУ
19 сакавіка, Позірк. Ваенная контрвыведка Службы бяспекі Украіны (СБУ) пры садзейнічанні галоўнакамандуючага Узброеных сіл і камандуючага Сіл беспілотных сістэм УСУ затрымала ў Харкаўскай вобласці “падвойнага агента”, які адначасова працаваў на ФСБ Расіі і выведку Дзяржпагранкамітэта Беларусі. Пра гэта 19 сакавіка паведаміла СБУ.
Затрыманы з’яўляўся вайскоўцам Сіл беспілотных сістэм. Знаходзячыся на пасадзе аператара БПЛА, ён, як заяўлена, паведамляў РФ і Беларусі даныя аб напрамках руху, тыпах і колькасці дронаў УСУ, якія былі задзейнічаныя ў баях на паўночным усходзе Украіны.
Адзначаецца, што пазней агент па ўказанні расійскіх і беларускіх спецслужбаў перавёўся на пасаду аператара наземных рабатызаваных комплексаў УСУ, якія эвакуююць параненых і дастаўляюць боепрыпасы на лінію фронту на Ізюмскім кірунку.
Аднак, паводле звестак СБУ, замест выканання службовых задач на перадавой фігурант збіраў інфармацыю аб дыслакацыі і планах баявых аперацый сумежных падраздзяленняў украінскіх войскаў.
Таксама мужчына “назапашваў для ворага звесткі аб тактыка-тэхнічных характарыстыках і асаблівасцях прымянення найноўшых рабатызаваных комплексаў Сіл абароны”.
Сцвярджаецца, што пасля выканання агентурных заданняў фігурант збіраўся збегчы ў РФ праз лінію фронту, дзе яго “павінны былі сустрэць расійскія спецслужбісты”.
Падчас ператрусаў у затрыманага канфіскаваныя два смартфоны з “доказамі яго працы на спецслужбы” Расіі і Беларусі, гаворыцца ў паведамленні.
Затрыманаму абвешчана аб падазрэнні паводле ч. 2 арт. 111 Крымінальнага кодэкса Украіны (дзяржаўная здрада, учыненая ва ўмовах ваеннага становішча). Мужчыну пагражае пажыццёвае пазбаўленне волі з канфіскацыяй маёмасці.
27 студзеня паведамлялася, што СБУ Украіны і Служба ўласнай бяспекі ГУР прадухілілі “пранікненне агента беларускага КДБ у падраздзяленне Сіл абароны”.
Заяўлялася, што ў выніку “шматэтапнай спецаперацыі” ў Кіеве затрыманая 35-гадовая грамадзянка Беларусі — “глыбока заканспіраваная шпіёнка, якая працавала на КДБ РБ з 2015 года”.
Гаворка ідзе пра Іну Кардаш, якая раней працавала журналісткай у Мінску, а з 2020 года — у Кіеве, у прыватнасці, у інфармагенцтве “Інтэрфакс-Украіна”.
