МУС адсправаздачылася аб затрыманні чацвярых “прыхільнікаў анархічных поглядаў”

19 сакавіка, Позірк. Пра затрыманне “групы прыхільнікаў анархічных поглядаў, а таксама іх лідара” паведаміла 19 сакавіка прэс-служба Міністэрства ўнутраных спраў.

Паводле слоў прадстаўніка ГУБАЗіК МУС Уладзіміра Гарагляда, чацвёра мінчан ва ўзросце ад 20 да 28 гадоў “неаднаразова на тэрыторыі архітэктурна-скульптурнага комплексу “Мінск — горад-герой”, дзейнічаючы з выключным цынізмам, здзяйснялі здзек над сімваламі перамогі і ахвярамі Вялікай Айчыннай вайны”.

“Фігуранты нецэнзурна лаяліся на адрас ветэранаў, плявалі на манумент, суправаджалі тое, што адбываецца, непрымальнымі каментарыямі. Тым самым адмаўляючы генацыд беларускага народа і подзвігі герояў. Тое, што адбываецца, яны здымалі на відэа, ролікі размяшчалі ў сацыяльных сетках”, — адзначыў Гарагляд.

Падчас ператрусаў выяўлена і канфіскавана “халодная зброя, адзенне і прадметы з анархічнай і нацысцкай сімволікай, сігнальны пісталет, аргтэхніка”.

Распачатая крымінальная справа за “злоснае хуліганства”, сказаў прадстаўнік ГУБАЗіК.

У 2021 годзе быў прыняты закон “Аб генацыдзе беларускага народа”. Пад беларускім народам у кантэксце дакумента “разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

За рэабілітацыю нацызму арт. 130¹ КК прадугледжвае адказнасць у выглядзе штрафу, арышту, абмежавання або пазбаўлення волі на тэрмін да 5 гадоў.