Кінафестываль, арганізацыі праваабаронцаў і эмігрантаў прызнаныя “экстрэмісцкімі фарміраваннямі“

19 сакавіка, Позірк. Праваабарончая арганізацыя Human Constanta, кінафестываль Northern Lights (“Паўночнае ззянне”) і арганізацыя Spadcyna Belarusi прызнаны Камітэтам дзяржаўнай бяспекі “экстрэмісцкімі фарміраваннямі” 11 сакавіка.

Змяненні ўнесены ў размешчаны на сайце МУС адпаведны спіс праз тыдзень, 18 сакавіка.

Пералічаны сайты ініцыятыў і іх старонкі ў сацсетках.

Human Constanta, паводле інфармацыі на яе сайце, працуе “з правамі чалавека ў трох асноўных напрамках: лічбавыя свабоды і правы; абарона правоў чалавека замежных грамадзян і асоб без грамадзянства; прасоўванне антыдыскрымінацыі і адукацыя ў галіне правоў чалавека”.

Па версіі КДБ, стаўленне да арганізацыі маюць Ганна Бараноўская, Аляксей Казлюк, Анастасія Лойка (палітвязняволеная, знаходзіцца ў няволі з кастрычніка 2022 года. прысуджаная да сямі гадоў пазбаўлення волі), Яна Ганчарова, Эніра Браніцкая, Валерыя Кустава, Кірыл Кафанаў, Андрэй Сушко і Юлія Стасюк.

Northern Lights (“Паўночнае ззянне“) — штогадовы кінафестываль, які прапануе гледачам ігравыя і дакументальныя фільмы краін Паўночнай Еўропы, Балтыі, Украіны і Беларусі. Заснаваны прадзюсарам Вольгай Чайкоўскай пры падтрымцы офіса Савета міністраў паўночнаеўрапейскіх краін у Літве. Упершыню прайшоў у 2015 годзе ў Мінску, зараз арганізуецца анлайн.

Па версіі КДБ, акрамя Чайкоўскай да “экстрэмісцкага фарміравання” датычныя Надзея Зелянкова і Дар’я Жук.

Spadcyna Belarusi знаходзіцца ў польскім Вроцлаве, пазіцыянуе сябе як “бяспечную прастору для палітычных эмігрантак, моладзі і супольнасці ЛГБТК+”. Камітэт дзяржаўнай бяспекі лічыць датычнымі да арганізацыі Дар’ю Зямлянскую і Анастасію Сасыкбаеву.

Цяпер у спісе “экстрэмісцкіх фарміраванняў”, якія сумесна вядуць КДБ і МУС, 340 арганізацый.