У выніку ДТЗ пад Мінскам шпіталізаваныя дарослы і дзіця

7 сакавіка, Позірк. Два чалавекі пацярпела ў выніку дарожна-транспартнага здарэння ранкам 7 сакавіка непадалёк ад сталіцы, паведамляе Дзяржаўтаінспекцыя Мінскай вобласці.

Паводле інфармацыі службы, аварыя здарылася на 14-м кіламетры аўтадарогі М-2. Гэта магістраль, якая злучае Мінск з аэрапортам. Месца, якое называе ДАІ, знаходзіцца на прамым участку паміж вёскай Каралёў Стан і аграгарадком Слабада.

Паведамляецца, што 61-гадовы жыхар Брэсцкай вобласці за стырном “Пежо” ехаў разам з 7-гадовай пасажыркай у бок Мінска. Каля 6:30 аўтамабіль урэзаўся ў грузавік “Івека”, кіроўца якога спыніўся праз тэхнічную паломку.

Кіроўца “Пежо” і дзяўчынка былі дастаўленыя ў бальніцу.

Вядзецца праверка.

У сувязі са здарэннем абласная ДАІ рэкамендавала кіроўцам “быць вельмі пільнымі за стырном, выбіраць бяспечную хуткасць руху і дыстанцыю”, а таксама не спяшацца з заменай зімовых шын на летнія.