Доля парушэнняў антыманапольнага заканадаўства ў разгледжаных МАРГ справах вырасла ў 2,3 раза

6 сакавіка, Позірк. За 2025 год Камісіяй па выяўленні факта наяўнасці (адсутнасці) парушэння антыманапольнага заканадаўства пры МАРГ разгледжана 46 спраў, паводле якіх устаноўлена 14 фактаў наяўнасці парушэння (30,4%), паведамляе ведамства.

Найбольш частымі былі нядобрасумленная канкурэнцыя (50% ад усіх парушэнняў) і парушэнне антыманапольных патрабаванняў да закупак тавараў (36%). Злоўжыванне дамінуючым становішчам выяўлена ў 7% выпадкаў.

Паводле вынікаў праведзеных антыманапольных расследаванняў у 2025 годзе складзены і накіраваны ў суд 41 пратакол аб адміністрацыйным правапарушэнні, сума штрафных санкцый склала каля 54 тысяч рублёў.

Паводле даных МАРГ, у 2024 годзе вышэйзгаданай камісіяй разгледжана больш за 100 адпаведных матэрыялаў, устаноўлена 13 фактаў парушэнняў (13%). Акрамя таго, за парушэнне антыманапольнага заканадаўства міністэрствам вынесена сем прадпісанняў.

Такім чынам, доля парушэнняў антыманапольнага заканадаўства ў разгледжаных справах павялічылася ў 2025 годзе ў параўнанні з 2024-м у 2,3 раза.