Другі дзень запар фіксуецца рэкордная з пачатку года колькасць загінулых ад агню, усяго за двое сутак — 15 ахвяр

13 студзеня, Позірк. За мінулыя дзяжурныя суткі (з 6:00 12 студзеня да 6:00 13 студзеня) ахвярамі пажараў у Беларусі стала 8 чалавек — гэта новая рэкордная сутачная колькасць у 2026 годзе, сведчаць даныя Міністэрства па надзвычайных сітуацыях.

Папярэдняя максімальная сёлета сутачная колькасць загінулых была днём раней — 7.

Такім чынам, за двое сутак загінула 15 чалавек.

У зводцы МНС паведамляюцца падрабязнасці гібелі людзей ад агню ў мінулыя суткі.

У Лідзе (Гродзенская вобласць) і Оршы (Віцебская вобласць) у бальніцах памерлі людзі, якія атрымалі траўмы на пажарах у канцы мінулага года.

Па адным чалавеку загінула на пажарах у Брэсцкім раёне, Пухавіцкім і Салігорскім раёнах Мінскай вобласці, а таксама ў Мінску.

Два чалавекі сталі ахвярамі пажару ў Глыбоцкім раёне (Віцебская вобласць).

Паводле звестак МНС, з пачатку года ў Беларусі здарыліся 293 пажары, 30 з іх — за апошнія суткі. Год таму на гэты дзень іх было 237, рост склаў 23,6%. Загінулі 43 чалавекі (37, +16,2%), траўмаваныя 25 (20, +25%), выратаваныя 28 (21, +33,3%).

Пры гэтым, як адзначаў “Позірк”, за няпоўныя два тыдні МНС ужо паспела ў чарговы раз адкарэктаваць колькасць ахвяр пажараў у бок змяншэння (на 3 чалавекі).

Згодна з тлумачэннем ведамства, часам пасля правядзення судова-медыцынскай экспертызы высвятляецца, што смерць наступіла не з-за пажару. Наадварот, як заявіла МНС, узгаранне часам можа ўзнікнуць пасля таго, як чалавек памёр.