Мінскі суд праз пяць дзён адмяніў сваё рашэнне аб прызнанні “экстрэмісцкім” сайта Савета Еўропы

15 снежня, Позірк. Суд Партызанскага раёна Мінска адмяніў сваё рашэнне аб прызнанні “экстрэмісцкімі матэрыяламі” афіцыйнага сайта Савета Еўропы, паведамляе праваабарончы цэнтр “Вясна”.

Праваабаронцы звярнулі ўвагу, што змены ў адпаведны пералік на сайце Міністэрства інфармацыі ўнесеныя 10 снежня.

5 снежня суд Партызанскага раёна Мінска прызнаў “экстрэмісцкімі матэрыяламі” старонку Канферэнцыі міжнародных няўрадавых арганізацый (CINGO), размешчаную на сайце Савета Еўропы. Пры гэтым у рашэнні быў пазначаны coe.int — сам афіцыйны сайт Савета Еўропы.

Савет Еўропы (СЕ) — міжнародная арганізацыя, заснаваная ў 1949 годзе, якая аб’ядноўвае 46 еўрапейскіх краін для прасоўвання дэмакратыі, правоў чалавека, вяршэнства права і культурнага супрацоўніцтва, якая мае штаб-кватэру ў Страсбургу (Францыя).

Беларусь — адзіная краіна на кантыненце, якая не стала членам Савета Еўропы. У сакавіку 2022 года супрацоўніцтва СЕ з рэжымам Аляксандра Лукашэнкі было прыпынена з-за падтрымкі ім агрэсіі Расіі супраць Украіны, і тады ж Расія была пазбаўленая членства ў Савеце Еўропы.

У якасці альтэрнатывы Камітэт міністраў Савета Еўропы стварыў кантактную групу па супрацоўніцтве паміж СЕ і дэмакратычнымі сіламі і грамадзянскай супольнасцю Беларусі.

Кантактная група працуе на прынцыпах празрыстасці ва ўзаемадзеянні з шырокім колам грамадскіх ініцыятыў Беларусі. Яе пасяджэнні праводзяцца на рэгулярнай аснове два разы на год.

Ад Савета Еўропы ў групе ўдзельнічаюць прадстаўнікі ўсіх палітычных структур, у тым ліку ПАСЕ і Офісу камісара па правах чалавека. СЕ таксама прадаставіў дэмсілам асобны офіс у сваім будынку ў Страсбургу.

Другое сёлета пасяджэнне кантактнай групы прайшло 12 снежня.

На папярэднім пасяджэнні, 24 чэрвеня ў Страсбургу, прадстаўнікі АПК, Каардынацыйнай рады, Офіса Святланы Ціханоўскай, СМІ, праваабарончых і іншых арганізацый грамадзянскай супольнасці абмеркавалі з кіраўніцтвам структур Савета Еўропы рэалізацыю двухгадовай праграмы супрацоўніцтва.