Урачы фіксуюць “добрыя знакі” ў стане Аляксандра Мілінкевіча — жонка палітыка

30 лістапада, Позірк. Пра стан здароўя Аляксандра Мілінкевіча паведаміла на сваёй старонцы ў “Фэйсбуку” яго жонка Іна Кулей.

“Дактары кажуць, што ёсць добрыя знакі, пра якія яшчэ рана гаварыць”, — напісала яна.

Паводле слоў Кулей, 30 лістапада аб здароўі палітыка памоліцца ў Варшаве беларускі ксёндз Вячаслаў Барок. Малітва пройдзе ў касцёле Святога Аляксандра на плошчы Трох Крыжоў, пачатак а 18:00.

“Сардэчна дзякую кожнай і кожнаму за падтрымку і малітву. Не толькі лекі, але і моц гэтай пазітыўнай энергіі дапамагаюць Аляксандру Мілінкевічу адужваць”, — адзначыла жонка палітыка.

Як паведамляў “Позірк”, малітва за здароўе Мілінкевіча прайшла ўвечары 28 лістапада ў касцёле Святога Крыжа ў Кракаўскім прадмесці Варшавы.

78-гадовы пазаштатны дарадца дэмакратычнага лідара Святланы Ціханоўскай, канцлер Вольнага Беларускага ўніверсітэта, кандыдат у прэзідэнты на выбарах 2006 года Аляксандр Мілінкевіч знаходзіцца ў аддзяленні інтэнсіўнай тэрапіі, куды быў пераведзены з рэанімацыі, дзе яго стан ацэньваўся як вельмі цяжкі. Перад гэтым палітык перанёс аперацыю па стэнтаванні соннай артэрыі, якая, паводле слоў яго жонкі Іны Кулей, на 80% была закрытая тромбам. Пасля яго выдалення і аднаўлення крывацёку ў Мілінкевіча рэзка падняўся ціск.

Кулей паведаміла, што ён уведзены ў медыкаментозны сон, каб арганізм не марнаваў сілы на рухі.