Латушка заклікаў еўрапейскіх палітыкаў “не будаваць сцяну для беларусаў”

30 лістапада, Позірк. “Не будаваць сцяну для беларусаў” заклікаў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка, выступаючы на Кангрэсе маладых еўрапейскіх кансерватараў і рэфарматараў.

“Беларусы хочуць быць у Еўропе. Не забывайце, што Беларусь і беларускі народ — гістарычная частка Еўропы, а не частка Расіі”, — адзначыў палітык.

“Як прадстаўнік АПК я ўвесь час выступаю за тое, каб як мага мацней санкцыі былі на рэжым Лукашэнкі, бо дыктатар разумее толькі мову сілы. Але для беларусаў трэба адкрываць межы. Каб беларусы маглі наведваць Польшчу, ЕС, іншыя краіны”, — сказаў Латушка.

Ён падкрэсліў важнасць “інфармацыйнай салідарнасці праз падтрымку незалежных СМІ, блогераў, сацыяльных медыя-ініцыятыў і палітыкаў, палітычнай салідарнасці праз падтрымку альтэрнатыўных рэжыму дэмакратычных інстытутаў, прававой салідарнасці праз прыцягненне дыктатара да міжнароднай прававой адказнасці”.

Паводле слоў намесніка кіраўніка АПК, бяспека Еўропы “залежыць ад будучыні беларускага народа”. “І калі кажам, што “беларускі балкон” цяпер — вялікая пагроза для бяспекі Еўропы, Украіны, то трэба праактыўная стратэгія, каб змяніць сітуацыю ў Беларусі”, — удакладніў ён.

“Нам патрэбна стратэгія, як зрабіць так, каб дэмакратычныя змены ў Беларусі наступілі. Гэта залежыць у першую чаргу ад нас, беларусаў, за нас ніхто гэтага не зробіць, але без салідарнасці, без праактыўнай падтрымкі, гэтага дасягнуць будзе цяжка”, — заявіў палітык.

Паводле слоў Латушкі, Лукашэнка “будзе заўсёды саюзнікам Расіі, ён не зменіць палітыку поўнай залежнасці краіны”. “Таму падтрымліваць трэба беларускі народ, бо толькі беларусы могуць быць гарантам незалежнасці краіны”, — падкрэсліў Латушка.

Кангрэс маладых еўрапейскіх кансерватараў і рэфарматараў праходзіў 27–29 лістапада ў Любліне (Польшча). На сайце кангрэса сярод яго ўдзельнікаў указаныя прэзідэнт Польшчы Караль Наўроцкі, лідар вядучай апазіцыйнай партыі “Права і справядлівасць” Яраслаў Качыньскі, прэм’ер-міністр Польшчы ў 2017–2023 гадах Матэвуш Маравецкі, кіраўнік дэлегацыі Еўрапарламента па сувязях з Беларуссю Малгажата Гасеўска і інш.