На пажары ў Смалявіцкім раёне загінулі два браты

30 лістапада, Позірк. Чатыры чалавекі загінулі ад агню за мінулыя дзяжурныя суткі (з 6:00 29 лістапада да 6:00 30-га), вынікае з аператыўнай зводкі Міністэрства па надзвычайных сітуацыях.

Два чалавекі загінулі ў вёсцы Малое Залужжа Смалявіцкага раёна (Мінская вобласць). Узгаранне там адбылося ў кватэры двухкватэрнага жылога дома па вуліцы Зарэчнай.

“На пажары выяўленыя загінулыя сыны гаспадыні 1978 г.н. і 1986 г.н. Прычыны пажару і гібелі высвятляюцца”, — гаворыцца ў зводцы.

Пенсіянер 1958 г.н. загінуў ад агню ў Асіповічах (Магілёўская вобласць). Пры гэтым з атручваннем прадуктамі гарэння шпіталізаваная яго жонка 1962 г.н.

Цела пенсіянера 1943 г.н. знойдзена на пажары ў аграгарадку Яроміна Гомельскага раёна.

Паводле афіцыйных звестак МНС, з пачатку 2025 года ад агню загінула 475 чалавек — на 0,6% менш, чым за аналагічны перыяд 2024-га (478). З пачатку студзеня адбылося 5.826 пажараў (5.633; +3,4%).