Судовая сістэма не павінна выкарыстоўвацца для крыміналізацыі праваабарончай дзейнасці — прадстаўніцтва ЕС
29 лістапада, Позірк. Судовая сістэма не павінна выкарыстоўвацца для крыміналізацыі праваабарончай дзейнасці або падаўлення іншадумства, гаворыцца ў апублікаванай 29 лістапада заяве прадстаўніцтва Еўрасаюза ў Мінску з нагоды Міжнароднага дня жанчын-праваабаронцаў.
“Многія жанчыны сутыкаюцца з пераследам і сфабрыкаванымі крымінальнымі абвінавачваннямі. Актывістак прыгаворваюць да працяглых тэрмінаў турэмнага зняволення за праваабарончую дзейнасць, дадаюць у спіс “тэрарыстаў“, каб яшчэ больш абмежаваць іх правы, і ў турме яны пакутуюць ад сур’ёзных праблем са здароўем“, — падкрэслівае прадстаўніцтва.
Паводле спісу палітвязняў, які вядзе праваабарончы цэнтр “Вясна”, ад крымінальнага пераследу пасля 2020 года пацярпелі пяць жанчын-праваабаронцаў: Марфа (Марыя) Рабкова (14 гадоў 9 месяцаў пазбаўлення волі, адбывае пакаранне), Анастасія Лойка (7 гадоў; адбывае пакаранне), Алена Маслюкова (3 гады; адбывае пакаранне), Ксенія Сырамолат (2,5 года; на волі) і Таццяна Ласіца (2,5 года; на волі).
