Лукашэнка зацікаўлены развіваць стасункі з Палестынай

29 лістапада, Позірк. Пра зацікаўленасць у развіцці супрацы паміж Беларуссю і Палестынай у “сферах сумеснага інтарэсу на карысць абодвух народаў” заявіў Аляксандр Лукашэнка, віншуючы 29 лістапада прэзідэнта гэтай часткова прызнанай дзяржавы на Блізкім Усходзе Махмуда Абаса з Міжнародным днём салідарнасці з палестынскім народам (заснаваны Генасамблеяй ААН у 1977 годзе).

На думку беларускага палітыка, тэкст паслання якога апублікавала яго прэс-служба, гэты дзень сімвалізуе “справядлівае імкненне да захавання сваёй ідэнтычнасці, умацавання дзяржаўнасці і незалежнасці”.

“Дасягненне трывалага міру на Блізкім Усходзе і стварэнне Дзяржавы Палестына ў адпаведнасці з рашэннямі Генеральнай Асамблеі Арганізацыі Аб’яднаных Нацый з’яўляюцца безумоўнай асновай забеспячэння доўгатэрміновай стабільнасці ў рэгіёне”, — падкрэсліў Лукашэнка.

Паміж Мінскам і Рамалай, адзначыў ён, сфармаваліся “шматгадовыя дружалюбныя сувязі”, якія грунтуюцца на “трывалым падмурку партнёрства, узаемнай павагі і даверу”.

Год таму ў віншаванні Абасу Лукашэнка выказаў зацікаўленасць у “далейшым паглыбленні дружалюбнага дыялогу” і “рэалізацыі значнага патэнцыялу супрацы”.

Палітык “асабліва адзначыў блізкасць падыходаў Беларусі і Палестыны да пашырэння міжнародных стасункаў, якія грунтуюцца на агульнапрызнаных прынцыпах суверэннай роўнасці краін, узаемнай павазе і ўліку інтарэсаў”.

20 траўня 2025 года на сустрэчы міністра замежных спраў Максіма Рыжанкова і амбасадара Палестыны Ахмеда Махамеда аль-Мадбуха з нагоды завяршэння яго дыпламатычнай місіі ў Беларусі сярод іншага абмяркоўваліся “пытанні супрацы ў розных сферах у рамках двухбаковага парадку дня і ўзаемадзеяння ў міжнародных арганізацыях”.

У 1988 годзе СССР афіцыйна прызнаў Дзяржаву Палестына. Прызнанне з боку БССР, якая ўваходзіла ў склад Савецкага Саюза, пасля перайшло да Рэспублікі Беларусь.