Баранавіцкі будтрэст плануе прыцягнуць на працу муляроў з Пакістана

28 лістапада, Позірк. Муляроў з Пакістана плануе прыцягнуць на працу ААТ “Будтрэст №25” у Баранавічах (Брэсцкая вобласць). Пра гэта паведаміў намеснік генеральнага дырэктара па ідэалагічнай працы і сацыяльных пытаннях прадпрыемства Віталь Логінаў, адзначае прэс-служба Палаты прадстаўнікоў Нацыянальнага сходу (ПП НС).

Паведамляецца, што 28 лістапада дэпутаты ПП НС наведалі ў Баранавічах два прадпрыемствы, на якіх занятыя замежныя рабочыя.

Прадстаўнік будтрэста паведаміў парламентарыям, што ў 2024 годзе на прадпрыемстве працавала 50 чалавек з Туркменістана, сёння іх засталося 30. Гэта звязана з тым, што “праца няпростая, патрабуе шмат сіл”, і працаваць “засталіся самыя надзейныя і правераныя людзі”, сказаў Логінаў.

Дэпутаты таксама наведалі ТАА “ЭлегмаІнвест”, якое спецыялізуецца на вытворчасці шампіньёнаў. Тут працуе 143 чалавекі, 37 з іх — працоўныя мігранты з Непала, Туркменістана і іншых дзяржаў. Заяўляецца, што да канца года іх колькасць павялічыцца да 52.

Пазней у гарадскім выканкаме прайшло выязное пасяджэнне дэпутатаў, выступаючы на якім старшыня пастаяннай камісіі ПП НС па міжнародных справах Сяргей Рачкоў заявіў, што “сітуацыя ў сферы знешняй працоўнай міграцыі ў Беларусі абумоўленая зменамі ў прававой, сацыяльна-эканамічнай, дэмаграфічнай сферах“.

“За апошні год колькасць працоўных мігрантаў у Беларусі вырасла ў 1,5 раза. Усяго ў эканоміцы занята каля 32 тыс. працоўных мігрантаў. З іх 71,7% — мужчыны. Прыезджыя з Туркменістана і Узбекістана складаюць больш за палову працоўных мігрантаў (54%)“, — сказаў Рачкоў.

Паводле яго слоў, “за кошт працоўных-імігрантаў у дзяржавы ёсць магчымасць палепшыць рэсурсны патэнцыял эканамічнага росту краіны, інвестыцыйны клімат, збалансаваць айчынны рынак працы“.

Начальнік упраўлення па працы, занятасці і сацыяльнай абароне Баранавіцкага гарвыканкама Таццяна Вашко на пасяджэнні, як паведамляецца, распавяла “аб прыцягненні замежнай працоўнай сілы на тэрыторыю Баранавічаў для вырашэння праблем дэфіцыту кадраў“.

11 красавіка Аляксандр Лукашэнка па выніках сустрэчы ў Мінску з кіраўніком урада Пакістана Шахбазам Шарыфам заявіў, што краіны дамовіліся выпрацаваць механізм прыезду ў Беларусь пакістанскіх працоўных мігрантаў. Паводле яго слоў, Беларусь гатова прыняць 100–150 тыс. спецыялістаў.

Гэтыя планы выклікалі неадназначную рэакцыю ў грамадстве, якая, у сваю чаргу, выклікала раздражненне ў беларускіх уладаў.

5 лістапада стала вядома, што Палата прадстаўнікоў у двух чытаннях ратыфікавала падпісанае 11 красавіка ў Мінску беларуска-пакістанскае пагадненне аб рэадмісіі. Яно прадугледжвае абавязацельства Беларусі і Пакістана па запыце іншага боку прымаць уласных грамадзян, якія “заехалі або знаходзяцца на тэрыторыі дзяржавы запытваючага боку з парушэннем заканадаўства гэтай дзяржавы па пытаннях уезду, выезду і знаходжання замежных грамадзян і асоб без грамадзянства“.

Пры гэтым, як раней інфармаваў “Позірк“, у пакістанскім горадзе Лахор беспаспяхова ідзе пошук жадаючых папрацаваць у Беларусі па 16 будаўнічых спецыяльнасцях (па адзінаццаці з іх зарплата складае 600 долараў, па пяці — 1.800 беларускіх рублёў, або каля 615 долараў па актуальным курсе Нацбанка). Колькасць вакансій па іх, як было ўказана раней, вагаецца ад 5 да 15. Мяркуючы па інфармацыі на сайце Бюро эміграцыі і працаўладкавання за мяжой ўрада, попыту на гэты від работ не назіраецца.

Раней Пакістанская кампанія R.B.S. Brothers шукала ахвотных папрацаваць у Беларусі ў якасці некваліфікаваных рабочых, прапаноўваючы заробак у памеры 2.500 беларускіх рублёў (каля 850 долараў). З 18 лістапада, калі была размешчаная аб’ява, да 21 ліку 4 з 6 вакансій ужо былі запоўненыя.