Рыжанкоў на пачатку наступнага тыдня накіруецца ў Маскву

20 лістапада, Позірк. Міністр замежных спраў Беларусі Максім Рыжанкоў 24–25 лістапада наведае Маскву для ўдзелу ў штогадовым сумесным пасяджэнні калегій МЗС Беларусі і МЗС Расіі, паведаміла на брыфінгу 20 лістапада прэс-сакратар расійскага знешнепалітычнага ведамства Марыя Захарава.

Паводле яе інфармацыі, бакі падсумуюць прамежкавыя вынікі выканання рашэнняў папярэдняга пасяджэння і праграмы ўзгодненых дзеянняў у галіне знешняй палітыкі дзяржаў — удзельніц Дагавора аб стварэнні Саюзнай дзяржавы на 2024–2026 гады. Чакаецца падпісанне плана кансультацый паміж МЗС на 2026 год.

Міністры Рыжанкоў і Сяргей Лаўроў “абмяркуюць актуальныя пытанні двухбаковага супрацоўніцтва і знешнепалітычнага ўзаемадзеяння, у тым ліку па дыпламатычным суправаджэнні інтэграцыйных працэсаў у рамках Саюзнай дзяржавы, а таксама абмяняюцца думкамі па міжнародным парадку дня“.

Папярэдняе пасяджэнне сумеснай калегіі адбылося 22 лістапада 2024 года ў Брэсце. Тады Рыжанкоў паведаміў, што знешнепалітычныя ведамствы Беларусі і Расіі выпрацоўвалі стратэгію сумесных дзеянняў па супрацьдзеянні санкцыям з выкарыстаннем міжнародных інструментаў абароны.

Таксама, паводле яго слоў, на мерапрыемстве абмяркоўваліся пытанні “юрыдычнай агрэсіі“ ў дачыненні да Беларусі і Расіі “з пункту гледжання выкарыстання неправамерных прававых інструментаў для здзяйснення ціску з прыцягненнем прававых інстытутаў, якія знаходзяцца ў вялікай ступені пад кантролем калектыўнага Захаду“.

У Брэсце Рыжанкоў і Лаўроў сярод іншага падпісалі Дэкларацыю Рэспублікі Беларусь і Расійскай Федэрацыі аб павышэнні ролі міжнароднага права і аб кіруючых прынцыпах, якія тычацца кваліфікацыі аднабаковых прымусовых мер у якасці супрацьпраўных, а таксама шляхоў і сродкаў процідзеяння, змякчэння і кампенсавання негатыўных наступстваў такіх мер і Сумеснае бачанне Еўразійскай хартыі разнастайнасці і шматпалярнасці ў XXI стагоддзі.

Лаўроў наведваў Беларусь 28 кастрычніка для ўдзелу ў III Мінскай міжнароднай канферэнцыі па еўразійскай бяспецы.