Чарговы баец палка Каліноўскага прыгавораны завочна ў т. зв. “днр” да пазбаўлення волі

8 лістапада, Позірк. “Вярхоўны суд” так званай “данецкай народнай рэспублікі” завочна прыгаварыў да 13,5 года пазбаўлення волі ў калоніі 29-гадовага добраахвотніка палка імя Кастуся Каліноўскага (ПКК) грамадзяніна Беларусі Кірыла Галаванава, паведамляе “пракуратура” гэтага акупаванага Расіяй украінскага рэгіёну.

Ён прызнаны вінаватым паводле ч. 3 арт. 359 КК РФ (удзел найміта ва ўзброеным канфлікце).

Сцвярджаецца, што Галаванаў “аб’яўлены ў міжнародны вышук”.

У 2024 годзе завочныя прысуды (па 14 гадоў пазбаўлення волі) ад калабарацыянісцкіх судовых органаў “днр” атрымалі за нібыта наёмніцтва беларускія добраахвотнікі Аляксандр Дамблаўскас і Ян Дзюрбейка. Апошні быў узяты ў палон у чэрвені 2022 года, інфармацыі пра яго месцазнаходжанне няма.

Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных сіл Украіны (ВСУ), а 21 траўня было абвешчана аб яго трансфармацыі ў полк.

У Беларусі па факце стварэння ПКК узбуджана крымінальная справа, ён прызнаны “экстрэмісцкім фарміраваннем” і “тэрарыстычнай арганізацыяй”, любая дапамога структуры або намер яе аказання, жаданне ўступіць у полк жорстка пераследуецца ўладамі.

Мінск падтрымлівае Маскву ў развязанай ёю поўнамаштабнай вайне супраць Украіны.