Шэсць банкаў абвясцілі пра новаўвядзенні ў працы з кліентамі
2 верасня, Позірк. Шэсць банкаў, якія працуюць у Беларусі, паведамілі пра змяненне асобных правілаў абслугоўвання і надалі новыя магчымасці для кліентаў, сведчыць праведзены “Позіркам“ маніторынг іх актуальных прэс-рэлізаў.
“Альфа Банк у Беларусі” паведаміў, што “Альфа Уклад (безадзыўны)” на 26 месяцаў цяпер можна адкрываць не толькі ў офісах фінансава-крэдытнай установы, але і праз мабільныя дадаткі InSync, INSNC і яго вэб-версію WEB INSNC.
У “Банку БелВЭБ” 1 кастрычніка зменяцца ўмовы ў рамках пакетаў паслуг “УСЁ”. Аднаўляецца падключэнне да пакета “Усё прэміяльна”, але пад новым найменнем — “Усё па максімуме online”. Кліентам будуць даступныя персанальнае анлайн-абслугоўванне, прэміяльныя прывілеі і магчымасці па картцы “Белкарт Максімум”, павялічаны памер манібэка. Таксама з наступнага месяца мяняюцца ўмовы па пакетах паслуг “Усё проста”, “Усё аптымальна”, “Усё па максімуме online”, “Усё па максімуме”: памер абаненцкай платы; умовы бясплатнага абслугоўвання; ліміты зняцця наяўных грашовых сродкаў у банкаматах іншых банкаў; колькасць бясплатных наведванняў бізнес-залаў аэрапортаў і чыгуначных вакзалаў.
Банк “ВТБ (Беларусь)” прыпыніў прыём дадатковых унёскаў па некаторых раней адкрытых дагаворах тэрміновых безадзыўных укладаў у расійскіх рублях. Пры неабходнасці кліенты банка могуць аформіць новыя тэрміновыя дэпазіты ў гэтай валюце з магчымасцю ўнясення дадатковых унёскаў.
“Белаграпрамбанк” 1 кастрычніка спыніць абслугоўванне картак міжнародных плацежных сістэм Mastercard і Visa з падоўжаным тэрмінам дзеяння. Банк рэкамендуе трымальнікам “загадзя звярнуцца ў любое зручнае падраздзяленне банка для замены карткі” або замовіць яе ў інтэрнэт-банкінгу альбо ў мабільным інтэрнэт-банкінгу.
“Беларусбанк” прапануе трымальнікам сваіх картак сістэмы UnionPay адпраўляць грашовыя пераводы MoneyExpress у доларах у Кітай праз сайт банка. Аперацыі выконваюцца ў анлайн-рэжыме без неабходнасці наведваць аддзяленні фінансава-крэдытнай установы.
“Белгазпрамбанк” 1 кастрычніка зніжае парогавую велічыню сярэднядзённага астатку, пры якім не спаганяецца ўзнагароджанне за абслугоўванне бягучых рахункаў у агульнай еўрапейскай валюце — з 500 тыс. да 200 тыс. еўра. Штомесячная камісія ў памеры 0,2% перавышэння будзе прымяняцца да сумы, якая складае розніцу паміж сумарнай сярэднядзённай рэштай за месяц па ўсіх рахунках у еўра і фіксаванай велічынёй у 200 тыс. еўра.
На 1 жніўня 2025 года ў Беларусі зарэгістраваны 21 банк (тры з іх — са 100-працэнтным замежным удзелам). Іх статутны капітал — 11 млрд 397,3 млн рублёў (+2,3% за месяц і +14,4% у гадавым вымярэнні).
Прыбытак банкаў, што працуюць у Беларусі, на 1 жніўня 2025 года склаў 2 млрд 719 млн рублёў — на 35,4% больш, чым месяцам раней (2 млрд 7,5 млн), і на 27,7% больш, чым на пачатак жніўня 2024-га (2 млрд 128,8 млн), сведчыць праведзены “Позіркам” аналіз даных Нацыянальнага банка.
Запазычанасць па рублёвых і валютных крэдытах, выдадзеных банкамі юрыдычным асобам, на 1 жніўня 2025 года склала 61 млрд 172,3 млн рублёў, сведчаць даныя рэгулятара.
Праведзены “Позіркам” аналіз паказаў, што актуальная сума доўгу на 12,4% большая, чым было на 1 жніўня 2024-га (54 млрд 404,5 млн рублёў), і на 3,8% большая, чым на 1 студзеня 2025-га (58 млрд 952,8 млн).
Пратэрмінаваная запазычанасць на 1 жніўня склала 255,3 млн рублёў (+4,5%). На 1 студзеня яна складала 733,5 млн рублёў (зніжэнне амаль у 2,9 раза).
Запазычанасць фізічных асоб па крэдытах на 1 жніўня 2025 года склала 28 млрд 192,3 млн рублёў (год таму — 22 млрд 812,6 млн; +20,6%). Пратэрмінаваная — 48 млн рублёў (40,4 млн; +18,8%).
