Ціханоўская: Чэргі ў Аб’яднаны пераходны кабінет не выстройваюцца — перад усім праз бяспеку

Апублікавана на адкрытай версіі “Позірку” 9 жніўня 2025 года ў 10:21

9 жніўня, Позірк. Слуханні прадстаўнікоў Аб’яднанага пераходнага кабінета (АПК) ў Каардынацыйнай радзе (КР), што адбыліся 7-8 жніўня ў Варшаве, паказалі, што дамоўленасці аб супрацы паміж гэтымі структурамі выконваюцца, заявіла “Позірку” кіраўніца АПК, дэмакратычны лідар Беларусі Святлана Ціханоўская.

“Я вельмі радая гэтаму. І зараз я, канешне, буду чакаць вынікаў гэтых слуханняў: ухваліць ці не ухваліць Каардынацыйная рада тое, што яна пачула”, — адзначыла Ціханоўская.

Яна заявіла, што “ўпэўненая ў Аб’яднаным пераходным кабінеце”, кожны яго прадстаўнік “робіць максімум, што можна, у сваіх накірунках”.

Адказваючы на пытанне пра кадравы патэнцыял АПК, Ціханоўская прызнала, што “на пасады ў Аб’яднаны пераходны кабінет чэргі не выстройваюцца”. “Перш за ўсё гэта звязана з бяспекай. Людзі, можа, часам адчуваюць у сябе моц закрываць накірунак, але тое, што з гэтай працай яны адразу набудуць і крымінальныя справы, і пераслед родных, і пагрозы пастаянныя, канешне, вельмі стрымлівае. І менавіта праз гэта я так моцна шаную ўсіх, хто працуе ў такіх умовах”, — сказала дэмлідар.

Раней стала вядома, што ў АПК пачнуць працаваць новыя адказныя за накірункі: з’явіцца прадстаўнік па эканоміцы і фінансах, будзе заменены кіраўнік місіі дэмакратычнай Беларусі ва Украіне.

“Да каманды далучыцца Аліса Рыжычэнка па эканамічным накірунку. Гэтая пазіцыя была вакантнай вельмі доўга. І я чакала прапанову ад Каардынацыйнай рады, не дачакалася. І мы самі знайшлі чалавека”, — сказала дэмлідар.

Яна адзначыла, што гэта “вельмі цяжкі накірунак”. “Але ж трэба займацца. Трэба займацца і прыцягненнем, магчыма, нейкай фінансавай падтрымкі для, напрыклад, СМІ ці культурніцкіх ініцыятываў. Але і з зачынам на будучыню, бо трэба будзе праводзіць эканамічныя рэформы. І пасля перамен эканамічная сітуацыя, я ўпэўненая, будзе вельмі цяжкая, і нам вельмі хутка трэба будзе перабудоўваць краіну, зыходзячы з новых умоў”, — акрэсліла Ціханоўская чаканні ад Рыжычэнка.

Да гэтага часу застаецца вакантнай пасада прадстаўніка АПК па аднаўленні законнасці і правапарадку. Раней яе займаў Аляксандр Азараў, аднак два гады таму КР вынесла яму недавер. “Я зноў нагадала Каардынацыйнай радзе, што хацела б бачыць яе прапановы”, — сказала Ціханоўская.