У выніку праходжання навальнічнага фронту ў Гомельскай вобласці зафіксавана больш за 30 выпадкаў падзення дрэў

4 чэрвеня, Позірк. У трох раёнах Гомельскай вобласці і самім абласным цэнтры ў выніку праходжання навальнічнага фронту зафіксаваны 31 выпадак падзення дрэў, пашкоджана шэсць аўтамабіляў, вынікае з інфармацыі МНС.

Па стане на 16.00 3 чэрвеня ведамства паведамляла аб 20 паваленых дрэвах і чатырох пашкоджаных аўто.

Адзначаецца, што работнікі МНС 10 разоў дапамагалі распілоўваць дрэвы, якія ўпалі — у Гомелі, Ельскім і Лельчыцкім раёнах.

Паводле звестак ведамства, у населеных пунктах вобласці фіксаваліся кароткатэрміновыя адключэнні электраэнергіі, якія “аператыўна аднаўляліся работнікамі РУП “Гомельэнерга”. Таксама адзначаны пашкоджанні трох дахаў будынкаў: дзвюх пабудоў у Лельчыцкім раёне і аднаго жылога дома ў Гомелі.

МУС 3 чэрвеня паведаміла аб тым, што ў непагадзь у Жлобінскім раёне Гомельскай вобласці адбылося ДТЗ, у выніку якога загінулі тры чалавекі і папярэдзіла: “У дрэнных умовах надвор’я вадзіцелю неабходна выбіраць бяспечную хуткасць, не рабіць неабдуманыя манеўры, выключыць рэзкія рухі рулём, разгоны і тармажэнні”.

“Белгідрамет” папярэджваў, што днём напярэдадні “ў паўднёвых раёнах краіны чакаюцца моцныя дажджы, месцамі па Гомельскай вобласці — вельмі моцныя дажджы”.

Паводле апошняй зводкі, “у начныя і ранішнія гадзіны 4 чэрвеня месцамі па краіне чакаецца туман”: “Уначы ў асобных раёнах рэспублікі — навальніцы, месцамі па паўднёвым усходзе моцныя дажджы”.

На працягу дня, паводле звестак МНС і Белгідрамета, чакаецца “пераменная воблачнасць, пераважна без ападкаў”.