Галоўнае ўпраўленне выведкі Мінабароны Украіны каардынуе наданне дапамогі вызваленым беларускім палітвязням — Вячорка

14 снежня, Позірк. Цягам бліжэйшых гадзін вызваленых і вывезеных ва Украіну беларускіх палітвязняў наведаюць кіраўнік місіі дэмакратычных сіл ва Украіне Святлана Шаціліна і прадстаўнік Аб’яднанага пераходнага кабінета па абароне і нацыянальнай бяспецы Вадзім Кабанчук, паведаміў журналістам раніцай 14 снежня галоўны дарадца Святланы Ціханоўскай Франак Вячорка.

Яны “высвятляць тэрміновыя патрэбы, сітуацыю з дакументамі і магчымыя крокі па далейшай рэлакацыі”.

“Паралельна разам з праваабаронцамі мы збіраем кантакты родных вызваленых, а таксама камунікуем з партнёрамі ў ЕС па пытаннях легалізацыі”, — адзначыў Вячорка.

Паводле яго слоў, з украінскага боку працэс каардынуюць прадстаўнікі Галоўнага ўпраўлення выведкі Міністэрства абароны Украіны. “На дадзены момант усім вызваленым аказваецца неабходная медыцынская дапамога. Мы вельмі ўдзячныя кіраўніку ГУВ Кірылу Буданаву”, — заявіў дарадца.

Дзеля бяспекі, дадаў ён, украінскі бок просіць СМІ не шукаць месцы размяшчэння былых вязняў.

13 снежня з Беларусі ва Украіну было вывезена 114 зняволеных — 109 беларускіх грамадзян і 5 украінскіх. Гэта адбылося пасля перамоваў спецпрадстаўніка прэзідэнта ЗША Дональда Трампа по Беларусі Джона Коўла з Аляксандрам Лукашэнкам. Раней Коўл быў намеснікам спецпрадстаўніка Трампа па Украіне Кіта Келага.

Беларускія вязні былі прынятыя паводле той жа схемы, што і ўкраінцы, якіх вызваляюць з расійскага палону.