У Польшчы за кантрабанду цыгарэт затрыманыя два беларусы

13 снежня, Позірк. Два беларусы 29 і 47 гадоў затрыманыя 11 снежня за кантрабанду цыгарэт каля населенага пункта Тыборы-Тшчанка ў Польшчы, паведамляе прэс-служба паліцыі.

Мужчыны шукалі паветраны шар, які прызямліўся, з 1.300 пачкамі цыгарэт. Пазней аператыўнікі знайшлі іх машыну, у якой выявілася яшчэ 5.200 пачкаў цыгарэт без польскіх акцызных марак.

Затрыманым прад’яўлена абвінавачанне ва ўхіленні ад выплаты падаткаў.

У кастрычніку ў Сакалянах Падляскага ваяводства (Польшча) недалёка ад мяжы з Беларуссю прызямліўся паветраны шар з 1.200 пачкамі цыгарэт.

Адзначаецца, што на пачатку кастрычніка і ў верасні на тэрыторыі Падляскага ваяводства знаходзілі падобныя шары.

Пра спробы кантрабанды беларускіх цыгарэт з дапамогай паветраных шароў Памежная ахова Польшчы паведамляла ў сакавіку.

З Беларусі ў Літву з пачатку года заляцела больш за 600 паветраных шароў (метэазондаў) з кантрабанднымі цыгарэтамі, паведаміў агенцтву BNS прадстаўнік Службы аховы дзяржаўнай мяжы Гедрус Мішуціс.

Паводле яго слоў, пагранічнікамі было перахоплена больш за 70 шароў (11,6%).