18 лістапада, Позірк. Мігрант, які падазраецца ў смяротным раненні польскага сяржанта Матэвуша Сітэка 28 траўня на мяжы з Беларуссю, знаходзіцца ў Еўрасаюзе, паведаміў парталу wiadomosci.wp.pl камандуючы аперацыяй “Бяспечнае Падляшша” генерал Аркадыюш Шкутнік.
Паводле яго слоў, асоба мужчыны высветленая, маецца яго фота. Замежнік быў заўважаны ў Францыі і Бельгіі. Такім чынам, гэта “пытанне часу, калі яго арыштуюць”, перакананы Шкутнік.
Генерал таксама паведаміў, што польскія службы высветлілі асобы і склалі спіс найбольш небяспечных мігрантаў, якія кідалі ў салдат камяні, стралялі з рагатак. Цяпер у ім фігуруе 42 чалавекі.
Пра смерць вайскоўца 1-й танкавай брыгады Матэвуша Сітэка, параненага на мяжы з Беларуссю, стала вядома 6 чэрвеня. Паводле інфармацыі Памежнай аховы Польшчы, ён зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.
Дэмакратычныя сілы Беларусі ўсклалі адказнасць за яго гібель і атакі на мяжы на рэжым Аляксандра Лукашэнкі.
З пачатку 2024 года Польшча прадухіліла 28,8 тыс. спробаў мігрантаў незаконна перасекчы мяжу з боку Беларусі.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
