Гайдукевіч і Хіжняк падалі ў ЦВК дакументы для ўдзелу ў прэзідэнцкіх выбарах

30 кастрычніка, Позірк. У Цэнтральную выбарчую камісію пададзеныя дакументы для рэгістрацыі ініцыятыўных груп па вылучэнні кандыдатамі ў прэзідэнты Алега Гайдукевіча і Аляксандра Хіжняка, паведамляе прэс-служба ЦВК.

Пра свой намер ісці на выбары старшыня Ліберальна-дэмакратычнай партыі (ЛДП) Гайдукевіч заявіў 25 кастрычніка.

“На выбарах трэба падняць пытанні, якія турбуюць грамадзян. Павінна быць здаровая канкурэнцыя, дыскусія”, — сказаў лідар партыі, якая падтрымлівае Аляксандра Лукашэнку.

“Я хачу шчыра сказаць, вось ненавідзяць ворагі нашага прэзідэнта, цэнтры гэтыя заходнія, таму што ён захаваў краіну, ён захаваў суверэнітэт, умацаваў яе, не прадаў яе. І я хачу, каб іх ванітавала ад кожнага кандыдата ў прэзідэнты, які ўдзельнічае ў выбарах”, — дадаў ён.

Хіжняк — старшыня праўладнай Рэспубліканскай партыі працы і справядлівасці, дэпутат Мінгарсавета, дырэктар УП “Белндіпгорадабудаўніцтва”, якое падпарадкоўваецца Міністэрству архітэктуры і будаўніцтва.

29 кастрычніка ЦВК зарэгістраваў ініцыятыўную групу па зборы подпісаў за Лукашэнку. На пасяджэнні таксама былі разгледжаны заяўкі на рэгістрацыю ініцыятыўных груп Аляксандра Драздова і Юрыя Губарэвіча. Абедзве аднагалосна адхіленыя.

Прэзідэнцкія выбары прызначаныя на 26 студзеня 2025 года. Тэрмін рэгістрацыі ініцыятыўных груп заканчваецца 1 лістапада.