Ціханоўская правядзе “шэраг палітычных сустрэч” у ЗША
17 верасня, Позірк. Візіт беларускага дэмакратычнага лідара Святланы Ціханоўскай у Злучаныя Штаты Амерыкі адбудзецца 23–27 верасня.
Паводле інфармацыі прэс-службы палітыка, 23–25 верасня Ціханоўская паўдзельнічае ў мерапрыемствах 79-й сесіі Генеральнай Асамблеі ААН у Нью-Ёрку. Дэмлідар плануе ўзняць пытанні “ўдзелу Беларусі ў агрэсіі Расіі супраць Украіны, неабходнасці вываду расійскіх войскаў і ядзернай зброі з тэрыторыі Беларусі, прыцягнення да адказнасці Аляксандра Лукашэнкі і саўдзельнікаў рэжыму праз міжнародныя суды”.
Палітык таксама мае намер заклікаць да “рашучых захадаў супраць рэжыму Лукашэнкі” і абмеркаваць “крокі па вызваленні больш як 1.400 палітычных вязняў”.
Разам з дэлегацыяй Еўрасаюза ў Нью-Ёрку плануецца правесці дыскусію па сітуацыі ў Беларусі.
25 верасня Ціханоўская выступіць у Пенсільванскім універсітэце (штат Філадэльфія). 26 верасня яна наведае Вашынгтон, дзе ёй будзе ўручана прэмія Лантаса ў галіне правоў чалавека за 2024 год. У сталіцы ЗША дэмлідар “правядзе шэраг палітычных сустрэч”.
Візіт завершыцца 27 верасня наведваннем Чыкага, дзе Ціханоўская плануе сустрэцца з мясцовымі палітыкамі і выступіць з прамовай у Чыкагскай радзе па глабальных справах.
Папярэдні візіт беларускага палітыка ў ЗША адбыўся 17–23 верасня 2023 года і таксама быў спалучаны з мерапрыемствамі Генасамблеі ААН.
Прэмія Лантаса ў галіне правоў чалавека ўручаецца з 2009 года. Ёй узнагароджваюць па адным чалавеку на год. Заснаваная ў мэтах “падвышэння дасведчанасці пра парушэнні правоў чалавека і людзей, якія змагаюцца з імі па ўсім свеце”.
Лаўрэатамі прэміі ў розныя гады былі ўраджэнец Беларусі, былы прэзідэнт і прэм’ер-міністр Ізраіля, лаўрэат Нобелеўскай прэміі міру Шымон Перэс, а таксама далай-лама XIV (Нгагванг Лоўзанг Тэнцзін Г’ямцхо), экс-дзяржсакратар ЗША Хілары Клінтан і іншыя палітычныя і грамадскія дзеячы.