Заробкі не растуць, «плюшкі» ўрэзваюць, вялікі попыт на сеньёраў. Што адбываецца ў польскім ІТ

Каго шукаюць кампаніі?

Паводле слоў Томаша Буйка, у ІТ па-ранейшаму карыстаюцца попытам спецыялісты ў сферы даных, штучнага інтэлекту і кібербяспекі. Ніжэйшыя заробкі звязаныя з такімі сферамі, як тэхпадтрымка або спецыяльнасці для дызайнераў.

ІТ-індустрыя ўжо некалькі гадоў змагаецца з крызісам: выйсці на рынак стала складаней, колькасць прапаноў для пачаткоўцаў скарачаецца, а ў некаторых сферах на адну вакансію дасылаюць па 370-500 прапаноў. Гэтае меркаванне падзяляюць нават айцішнікі са шматгадовым вопытам. Што ўжо казаць пра нядаўніх выпускніках ІТ-спецыяльнасцяў. 

Колькі плацяць айцішнікам?

Рынак карэктуе стаўкі, якія на пачатку пандэміі значна выраслі, а затым знізіліся і ўжо не дасягаюць узроўняў 2020 і 2021 гадоў.

Паводле даных No Fluff Jobs, у 2024 годзе самая нізкая заработная плата ў сферы ІТ, прапанаваная найбольш дасведчаным спецыялістам на аснове дамоў паміж кампаніямі, вырасла ў гадавым вылічэнні менш чым на 3% і склала 21,8 тыс. злотых нета (каля 5,5 тыс. долараў). А вось «верхнія» заробкі, наадварот, знізіліся ў сярэднім на 3,5% і вагаліся ў межах 27,5 тыс. злотых.

У выпадку ўмоў, а працэ заработная плата засталася нязменнай і склала 17-23 тысячы злотых брута (4,3-5,7 тыс. долараў).

Пачаткоўцы зараблялі 7-10,5 тыс. злотых нета (1,75-2,5 тыс. долараў) на аснове дамоваў паміж фірмамі і 6-9 тыс. злотых брута (1,5-2,25 тыс. долараў) на аснове працоўнай дамовы. Людзі з сярэднім узроўнем досведу атрымлівалі 16,8-22 тыс. злотых нета (4,2-5,5 тыс. долараў) і 12,4-18 тыс. злотых брута (3,1-4,5 тыс. долараў у залежнасці ад віду кантракта).

Пры гэтым Томаш Буек сцвярджае, што, мяркуючы з даходаў для некаторых ІТ-спецыяльнасцяў, можна заўважыць стабілізацыю. Зніжэнне ў дыяпазонах заробкаў было зафіксаванае толькі ў сямі спецыялізацыях. Размова ідзе, у прыватнасці, пра менеджараў праектаў, людзей, якія займаюцца інтэграцыяй праектаў паміж камандамі, а таксама спецыялістаў па мабільных праграмах.

Дарэчы, паводле даных аналізу экспертаў HRK, летась тэндэнцыя ІТ-спецыялістаў да частай змены працадаўцаў запаволілася. Здаецца, айцішнікі сталі шукаць стабільнасці.

Канец аддаленай працы?

Ужо другі год запар зніжаецца працэнт прапаноў з аддаленай працай. Хоць, паводле слоў Томаша Буйка, такі фармат працы ўсё яшчэ сустракаецца ў 48% вакансій.

Да аналагічных высноў прыйшлі эксперты HRK. Яны прызнаюць, што многія кампаніі не гатовыя прапаноўваць ІТ-спецыялістам цалкам аддаленую мадэль працы.

«Амаль палова кампаній, якія ўдзельнічаюць у нашым даследаванні, чакае ад кандыдатаў не менш за два дні працы на месцы», — кажа прадстаўніца фірмы Эва Папроцка.

Паводле назіранняў спецыялістаў No Fluff Jobs, усё менш кампаній прапаноўваюць супрацоўнікам такія выгоды, як паркоўка для ровараў, душавыя або пакоі адпачынку.

Эксперты мяркуюць, што гэты год не прынясе прарыву для ІТ-індустрыі. Аднак чакаецца рост колькасці праектаў і невялікае паляпшэнне.

Кіраўнік кадравага агенцтва IT Next Technology Пётр Юрэк падкрэслівае, што назіраецца павольнае размарожванне і вялікі попыт на сеньёраў. На жаль, джуны па-ранейшаму сутыкаюцца з вялікімі праблемамі пры выхадзе на рынак, і гэтая сітуацыя пакуль не зменіцца.