Аддзел навін 22 мая 2024, 16:49

Wall Street Journal назваў самага высокааплачванага СЕО мінулага года. Гэта не Кук і не Хуанг

Wall Street Journal вывучыў узнагароды гендырэктараў амерыканскіх кампаній за 2023 год.

Выданне адзначае, што за апошнія пяць гадоў заробак гендырэктараў многіх кампаній са спіса Fortune 500 значна вырас. Медыяна складае рэкордныя $15,7 млн.

Больш за ўсіх нечакана атрымаў кіраўнік Broadcom Хок Тан, агулам — $162 млн. Аднак цалкам выплату ён атрымае толькі ў выпадку выканання шэрагу ўмоў, напрыклад, пры дасягненні пэўнага ўзроўню акцыямі чыпмэйкера ў кастрычніку 2025 года. Таксама Тан мае заставацца на пасадзе пяць гадоў, на працягу якіх не зможа атрымліваць дадатковыя акцыі або грашовыя бонусы.

Каціроўкі Broadcom выраслі на 27% ад пачатку года і на 106% — за апошнія 12 месяцаў, а рынкавая капіталізацыя дасягнула $655 млрд.

Broadcom скарачае 1300 супрацоўнікаў VMware якую купіла год таму

На другім месцы размясціўся кіраўнік Palo Alto Networks Нікеш Арора. Яго ўзнагароджанне пераважна ў выглядзе акцыйных выплат склала $151 млн. На трэцім радку — гендырэктар інвестфірмы Blackstone Стывен Шварцман са $120 млн.

У топавую дзясятку трапіў СЕО Apple Цім Кук — $63,21 млн забяспечылі яму 6 пазіцыю. Кіраўнік Netflix Тэд Сарандас — на 8 радку ($49,8 млн).

Любімы сваімі супрацоўнікамі СЕО Nvidia Джэнсен Хуанг не ўвайшоў у топ-10, але яго пакет акцый пры канцы студзеня падаражэў у 4 разы да $107,5 млн. Нядаўна паведамлялася, што яго ўзнагароджанне за мінулы (2024) фіскальны год вырасла на 60% да $34,2 млн, з якіх $26,7 млн прыйшлося на RSU.