Навошта беларусы адпрошваюцца ва ўладаў на ПМЖ — і якія з гэтым праблемы (часцей з падаткамі)

У чаце беларуска паскардзілася, што падала ў консульства РБ у Польшчы заяву аб выездзе на ПМЖ, але ўзніклі праблемы з падатковай. Праз пару месяцаў пасля падачы з консульства прыйшоў імэйл. Са спасылкай на МПЗ у ім гаворыцца, што ў 2023 і 2024 гадах жанчына атрымлівала грашовыя пераводы з-за мяжы, будучы рэзідэнткай РБ, але падатковыя дэкларацыі не падала.

Дэкларацыю аб даходах за 2023 год трэба было падаць да 31 сакавіка, падаходны падатак выплаціць да 1 чэрвеня 2024 года. Што тычыцца пераводаў за 2024 год, то за іх трэба было даць справаздачу і разлічыцца, не чакаючы заканчэння падатковага года, яшчэ да фактычнага выезду на ПМЖ. 

Цяпер консульства дае беларусцы крыху менш за два месяцы на ўрэгуляванне (вочнае або завочнае) пытанняў з МПЗ. Калі гэтага тэрміну не хопіць, то абяцаюць прыняць адмоўнае рашэнне, консульскага збору не вернуць.

Наколькі распаўсюджаны гэта кейс, якія яшчэ падводныя камяні бываюць пры афармленні выезду на ПМЖ і навошта наогул гэтая нятанная (200 еўра з-за мяжы праз консульства, 10 БВ, або 400 BYN, — праз АГіМ) працэдура мігрантам. 

Навошта гэта наогул

Беларусы называюць тры прычыны:

• адсутнасць закладу за ўезд у РБ на машыне на замежных нумарах,
• легальны разрыў адносін з ваенкаматам (або неўступленне ў іх для хлопчыкаў),
• гарантыя, што сваякам не налічаць павышанай камуналкі за прапісаных у кватэры «дармаедаў» (калі, вядома, тыя, хто з’ехаў, самі не валодаюць кватэрай).

— Дазвол на ПМЖ — гэта ўезд у Беларусь да трох месяцаў без размытнення машыны і гарантыя таго, што не прызавуць у войска на зборы або ў часе вайны, а для тых, каму менш за 27, то і вызваленне ад тэрміновай службы, — кажа адзін чытач.

— Часта сустракалі, што на кватэру, у якой прапісаныя «дармаеды», прыходзіць падвышаная камуналка. Не хацелася б ускладняць жыццё бацькам, у якіх мы ў РБ прапісаныя, — кажа другая.

Якія бываюць праблемы з падатковай

Большасць беларусаў, якія даслалі свае гісторыі, так ці інакш змаглі аформіць выезд на ПМЖ незалежна ад таго, падаваліся яны ў АГіМ або ў консульстве сваёй новай краіны. Гэта заняло ў іх 1,5-6 месяцаў.

Прэтэнзіі падатковай не рэдкасць, прычым яны могуць быць 7-гадовай даўніны. Але ўсё вырашальна.

Кейс з booking.com

— У снежні мінулага года прыйшоў у АГіМ па месцы рэгістрацыі, запоўніў заяву (просяць шмат інфармацыі накшталт месца нараджэння і пражывання сваякоў, таму лепш даведацца ўсё загадзя), унёс аплату (10 БВ), прыклаў пасведчанні аб нараджэнні і шлюбе. Заяву прынялі, сказалі чакаць два месяцы.

Апавяшчэнне дасылаюць па месцы рэгістрацыі, я жыву ў іншым месцы, таму тэлефанаваў у Агім сам. Калі патэлефанаваў на пачатку лютага, высветлілася, што ў мяне не ўрэгуляванае пытанне з падатковай за 2017 год.

Вырашэнне пытання (аддалена) заняло каля двух тыдняў. 

Пасля гэтага я прыехаў у АГіМ па штамп. Паставілі два: аб выездзе на ПМЖ (без указання краіны) і аб ануляванні рэгістрацыі ў РБ. Акрамя гэтага, я падпісаў паперу аб тым, што маю стаць на консульскі ўлік у краіне знаходжання на працягу 60 дзён.

Яшчэ я патэлефанаваў у ваенкамат наконт ваеннага білета. Там сказалі здаць абавязкова, што я і зрабіў у той жа дзень. 

Кейс з Яндэкс.Талака

— Афармляла выезд у жніўні-верасні 2022 года праз консульства ў Беластоку. Там адразу папярэдзілі, што не мае быць даўгоў. А ў мяне якраз выявіўся доўг з 2017 або 2018 года, пра які я і не падазравала.

Быў такі сэрвіс, Яндэкс.Талака, я з ім трохі гулялася і зарабіла блізу 200 BYN. Шчыра кажучы, нават не думала, што з такіх капеек трэба плаціць падатак. І сама падатковая мяне ні пра што не паведамляла.

А тут мяне запрашаюць у консульства і паказваюць адмову МПЗ. Але, на шчасце, усё вырашылася проста: запаўняць дэкларацыю або пісаць тлумачальную не прыйшлося, сваякі аплацілі каля 20 BYN, і падатковая выслала ў консульства новую даведку, а праз месяц прыйшло станоўчае рашэнне.

Мы спыталі чытачоў, у якіх усё прайшло без сучка і задзірынкі, ці атрымлівалі яны замежныя пераводы. 

— Пераводзіла сама сабе грошы праз Paysend з польскай карты на беларускую раз на пару месяцаў, сумы былі ў межах $50 .

Якая яшчэ засада магчымая. Пасведчанне аб нараджэнні

Сям’я, якая ўжо жыве ў Польшчы і паспрабавала нядаўна падацца праз АГіМ у РБ, не змагла гэтага зрабіць праз пасведчанне аб нараджэнні свайго дзіцяці.

— Дачка нарадзілася ў Польшчы шэсць гадоў таму, пасведчанне аб нараджэнні адпаведна польскае, пашпарт афармлялі ёй у Беларусі, — расказаў тата. — Тыдзень таму падаваліся на выезд усёй сям’ёй, але ўсё абламалася, бо натарыяльнага перакладу польскага пасведчання аб нараджэнні дачкі выявілася недастаткова, запатрабавалі арыгінал пасведчання з перакладам + апастыль. 

Хоць два гады таму, калі мы рабілі дачцэ звычайны пашпарт, хапіла натарыяльнага перакладу пасведчання (без арыгінала). І нават два тыдні таму, калі я мяняў свой пашпарт РБ (пры падачы таксама патрабуюць пасведчанне аб шлюбе і аб нараджэнні дзяцей), Натарыяльны пераклад быў акей. 

Будзем рабіць другую спробу пазней.

Wanted. Калі вы сутыкнуліся з іншымі цяжкасцямі пры афармленні выезду на ПМЖ з Беларусі, пішыце нам у бот. Гэта ананімна.

Як мігранты старой хвалі ўладкаваліся ў Польшчы і што думаюць пра свой выбар

Па тэме

Як мігранты старой хвалі ўладкаваліся ў Польшчы і што думаюць пра свой выбар