«Дорага». Як дапамагатары зарабляюць на польскіх візах з новай сэлфі-верыфікацыяй

У чатах пішуць нават пра 2000 рублёў за «хутка і з гарантыяй». 

«Без чаргі і запісу праз сайт, але кошт — ад 2000 рублёў»

У чаце лоўлі дат на польскую візу заўсёды жывое абмеркаванне хібаў: слотаў на розныя тыпы віз мала (і рэдка), з верыфікацыяй складанасці, не ўсе хочуць марнаваць на гэты час, шмат у каго «дапамагатары» за 300-500+ рублёў, але гэта таксама дапамагае не ўсім. Адзін з карыстальнікаў цікавіцца: «Ці акей, калі дапамагатар не можа запісаць 4 месяцы». 

Некаторыя ў пошуках тых, хто зробіць «хутка і з гарантыяй» — мяркуючы з паведамленняў у чаце, такія таксама ёсць (дорага). Адзін з карыстальнікаў напісаў, што яму агучылі лічбу ў 2000 рублёў. Правяраць інфармацыю ён не стаў, бо яму «не патрэбна віза па такой цане».

Іван расказвае, што яму два тыдні таму ў іншым чаце рэкамендавалі чалавека, які «дапаможа за 1500+ рублёў». На той момант маладзён ужо супрацоўнічаў з іншымі «дапамагатарамі», яны выставілі рахунак у 550 рублёў за запіс — 2 месяцы ніякага выніку. Іван стаміўся чакаць, ужо гатовы быў раскашэліцца — і яму далі кантакт. Ён патэлефанаваў сваім «дапамагатарам», каб разарваць дамову.

— Але нечакана поспех: у той жа дзень яны запісалі мяне на падачу ў Гомелі (можа спалохаліся, што грошы сыдуць, і кінулі на гэта ўсе сілы). Гэта было два тыдні таму. 

Віталь кажа, што пры канцы мая змог з дапамогай «дапамагатараў» запісаць на візу дзяцей — «хутка, бо дзецям не трэба праходзіць верыфікацыю».

— Па 300 рублёў за кожнага: перадаплата — 50%, астатняя сума пасля. 

А вось яго жонку ўсё не могуць ніяк запісаць, «варыянту паскорыць працэс на дадзены момант няма».

«Шмат у каго расцэнкі выраслі на 150-200 рублёў»

Невялікае параўнанне паказвае, што паслугі некаторых агенцтваў сапраўды падаражэлі. 2 гады таму расцэнкі на запіс на сайце сеткі візавых цэнтраў VisaVisa (яны называюць сябе «нумарам 1 у Беларусі») складалі 500 рублёў, цяпер — ад 700 да 1050 рублёў. На сайце ёсць удакладненне, што па ніжняй мяжы плацяць тыя, хто сам рыхтуе дакументы. 

На сайце агенцтва visaBy пазначаныя наступныя расцэнкі.

Абмеркаваць нюансы, напрыклад, тэрміны і гарантыю выніку, журналісту devby.io не атрымалася — у чаце на сайце супрацоўнікі агенцтва, на жаль, не адказваюць, па нумары таксама не датэлефанавацца. 

Далейшы сёрфінг паказаў, што ў цэлым расцэнкі ў агенцтваў пачынаюцца ад 500 рублёў, калі запрашэнне ад працадаўцы падае кліент, і даходзяць да 800 — калі яго робіць агенцтва. Тэрміны — ад 2 тыдняў і больш.

Нашыя чытачы кажуць, што «шмат у каго, хто займаўся запісам на візы, расцэнкі выраслі на 150-200 рублёў». 

Яўген сваіх «дапамагатараў» называе «праверанымі»: раней малады чалавек двойчы запісваўся з іх дапамогай на візу, прычым у дзень звароту.

— Умовы былі такімі: 50% — перадаплата, яшчэ столькі ж — пасля запісу, уся сума складала 450 рублёў. Дапамагалі з анкетай і раздрукоўкай/ксеракопіямі ўсяго, што неабходна. 

На жаль, у тыя абодва разы Яўген атрымаў адмовы. Матывіроўка — сумнавядомы пункт 10, які гучыць так: «Ёсць абгрунтаваныя сумневы наконт дакладнасці зробленых вамі заяў пра мэту вашага знаходжання на тэрыторыі Рэспублікі Польшча ў сувязі з наяўнымі доказамі або аб’ектыўнымі абставінамі, якія паказваюць на тое, што мэта паездкі можа быць іншай, чым было заяўлена». devby.io ужо пісаў, што падобныя адмовы маглі быць звязаныя з візавым скандалам. 

Яўген зрабіў некалькі спроб запісацца самастойна — і зноў прыйшоў да «дапамагатараў». Даведаўся, што з увядзеннем новых правілаў верыфікацыі на сайце VFS іх паслугі падаражэлі — і каштуюць ужо 600 рублёў.

— Кожны тыдзень на сайце штосьці змянялася — і боты ад «дапамагатараў» відавочна не паспявалі за зменамі. Я бачыў свабодныя даты ў ботах — але пакуль праходзіў праз горы памылак вельмі каравага сайта, іх ужо не было. 

Некалькі разоў Яўген быў блізкі да мэты — заставаўся ўсяго адзін крок, апошні, але за ім малады чалавек зноў апынаўся на старонцы ўваходу ў акаўнт.  

— На мінулым тыдні — зноў новыя змены: 4 спасылкі верыфікацыі — і бан. І паколькі ўсё прывязана да нумара пашпарта, змена акаўнта нічога не дае. Лічы — яшчэ адзін тыдзень у пралёце.

Яўген кажа, што рады б неяк паскорыць працэс — «але такі варыянт не прапаноўваўся».

«Тыдзень можна самому спрабаваць — а потым даты зноў за хвіліну сыходзяць»

У чаце лоўлі дат ёсць паведамленні ад тых, каму ўдалося самастойна запісацца. Хутчэй за ўсё, большасць такіх карыстальнікаў проста не дае справаздачы ў чаце.

30 чэрвеня хтосьці падзяліўся поспехамі: «Учора свякроў запісалася сама — але я кантраляваў па фэйстайме. У мамы быў пашпарт заблочаны, але прайшло 24 гадзіны — і сёння мы пракруцілі тое ж самае. Вядома, не з першага разу».

Крыху вышэй у гэты ж дзень яшчэ паведамленне: дзяўчына запісалася на падачу ў Гомель, верыфікацыю прайшла з другога разу — а да таго было «амаль 4 месяцы спроб».

За 29 чэрвеня цэлых 8 паведамленняў ад шчасліўчыкаў, якія змаглі запісацца.

1 ліпеня адзін з карыстальнікаў падсумаваў, што ў апошнюю «раздачу больш людзей самі запісаліся, чым з «дапамагатарамі». Паводле яго назіранняў, так бывае, калі распрацоўшчыкі выкочваюць на сайт абнаўленні — «тыдзень можна самому спрабаваць, а потым даты зноў за хвіліну сыходзяць».

Як працуе запіс на польскія візы па сэлфі. Пасярэднікі нешта задумалі?

Па тэме

Як працуе запіс на польскія візы па сэлфі. Пасярэднікі нешта задумалі?