У Яндэкс Go ужо ўсё «адпавядае». Але дзе серверы, незразумела

Учора на нарадзе ў Лукашэнкі абмяркоўваліся пытанні аўтамабільных пасажырскіх перавозак. Ішла размова аб праекце ўказа, у якім маюць прапісаць патрабаванні да замежных агрэгатараў таксі мець юрыдычную асобу ў Беларусі, а таксама размяшчаць інфармацыю пра паездкі на серверах унутры краіны і даваць яе дзяржорганам.

Пасля аб’яднання Uber і Яндэкс.Таксі ў 2017–2018 гадах і пераходу на адзіную платформу найбуйнейшым у Беларусі агрэгатарам таксі з’яўляецца Яндэкс (цяпер Яндэкс Go). Мы спыталі Яндэкс Go пра цяперашні стан рэчаў: ці ёсць юрыдычная асоба і дзе захоўваецца інфармацыя аб паездках у Беларусі. У адказ атрымалі такі каментар ад прэс-службы:

— Лічым, што заканадаўства мае быць актуальным і спрыяць развіццю сферы перавозак у краіне, забяспечваючы працоўныя месцы, а таксама даступнасць перавозак для кожнага пасажыра. Раней мы прапаноўвалі сваё бачанне рэгулявання сферы. Часткова яно супадае з агучанымі патрабаваннямі. І мы гатовыя ўдзельнічаць у далейшай распрацоўцы, ужываючы свой міжнародны досвед.

У Беларусі сэрвіс Яндэкс Go рэгулярна ўкараняе і падтрымлівае ініцыятывы, накіраваныя на бяспеку кіроўцаў і пасажыраў. Напрыклад, у праграме для кіроўцаў дзейнічаюць сістэмы анлайн- і афлайн-верыфікацыі дакументаў, тэхналогіі маніторынгу хуткасці і стылю кіравання пры выкананні заказаў, а таксама бясплатная праграма дадатковага страхавання кіроўцаў і пасажыраў. Мы знаходзімся ў пастаянным дыялогу з прадстаўнікамі профільных ведамстваў у пытанні павышэння бяспекі сферы перавозак.

На ўдакладняльныя пытанні пра назву юрыдычнай асобы, месца захоўвання інфармацыі пра паездку і тое, што такое «інфармацыйны рэсурс», у кампаніі не адказалі. Галоўны меседж Яндэкс Gо — што кампанія «адпавядае заяўленым патрабаванням».

У адзіным дзяржрэгістры сапраўды значыцца ТАА «Яндэкс Дэліверы Бай», зарэгістраванае ў Мінску ў кастрычніку 2021 года. Выдаўцом жа праграмы Яндэкс Go значыцца Mikromobilnost LLC Belgrade. Выдаўцом праграмы Uber — Kronos LLC. 

Што да месца размяшчэння сервераў, незразумела. Як пісалі медыя мінулым летам, Яндэкс Go захоўвае ўсе даныя, у тым ліку пра замежныя паездкі, выключна ў расійскіх дата-цэнтрах. Ад 1 верасня 2023 года кампанія мусіць даваць ФСБ кругласутачны аддалены доступ да звестак пра паездкі. У сувязі з гэтым Упраўленне Нідэрландаў па абароне даных пачало расследаванне ў дачыненні да сэрвісу таксі Yango, які ўваходзіць у нідэрландскую Yandex N.V. Пры гэтым у Яндэксе сцвярджаюць, што ФСБ не даступная інфармацыя пра замежныя паездкі кліентаў. Яе могуць атрымаць праваахоўныя органы толькі той краіны, дзе гэтую паездку здзейснілі.

Агрэгатараў таксі прымусяць ствараць юрыдычныя асобы і захоўваць даныя ў Беларусі

Па тэме

Агрэгатараў таксі прымусяць ствараць юрыдычныя асобы і захоўваць даныя ў Беларусі