Uber у Польшчы спачатку заблакаваў, а потым разблакаваў кіроўцаў з пашпартамі РБ

Uber у Польшчы разблакаваў акаўнты кіроўцаў з грамадзянствам Беларусі, паведамляюць сёння незалежныя медыя.  

Аб праблеме сталі пісаць напярэдадні: кіроўцам з Беларусі Uber масава блакуе акаўнты. Абмежаванні закранулі нібыта сотні кіроўцаў, прычым не толькі ў Польшчы, але таксама ў Літве і Латвіі. Адзіная відавочная прыкмета, якая аб’ядноўвала іх, — пашпарт РБ.

Група кіроўцаў з’ездзіла ў офіс Uber у Варшаве, але гэта не дапамагло: там спаслаліся на ўнутраныя правілы кампаніі, на аснове якіх і прымаюцца рашэнні. У афіцыйным каментары кампанія зняпраўдзіла здагадку пра дыскрымінацыю.

Між тым, адразу пасля таго, як гісторыя разышлася па медыя і тыя звярнуліся ў кампанію па тлумачэнні, праблема раптам вырашылася. Паводле слоў кіроўцаў, прадстаўнікі Uber самі выйшлі на сувязь і прапанавалі прайсці паўторную верыфікацыю. Пасля гэтага ўсё запрацавала. 

Сувязь паміж грамадзянствам кіроўцаў і блакаваннямі Uber па-ранейшаму адмаўляе.