«Сказалі, што стаіць абмежаванне на выезд». Беларуску знялі з рэйса ў мінскім аэрапорце і адправілі ў РУУС

Што здарылася

Як расказала карыстальніца, увечары 30 студзеня яна разам з мужам і сябрамі збіралася паляцець у Тбілісі, а адтуль адправіцца ў горы катацца на снаўбордзе.

Спачатку ўсё ішло па плане, усе прайшлі рэгістрацыю, здалі багаж. Праблемы паўсталі пры праходжанні пашпартнага кантролю. Паводле слоў дзяўчыны, яна правяла на пашпартным кантролі «бясконцую колькасць часу» і была засмучаная, што ёй ніхто нічога не патлумачыў. У яе проста забралі дакументы і пакінулі чакаць.

Праз пэўны час да яе падышоў супрацоўнік памежнай службы і пачаў задаваць стандартныя пытанні: куды, навошта і з кім яна ляціць? А пазней мінчанцы паведамілі, што ёй забаронена пакідаць межы Беларусі і яе здымаюць з рэйса.

Пасля гэтага ў дзяўчыны пачалася істэрыка і поўнае неразуменне сітуацыі. Яна папрасіла патэлефанаваць мужу — яго вывелі з зоны д’юці-фры, і разам яны спрабавалі высветліць, у чым рэч. Але памежнікі паведамілі, што не ведаюць прычын і прапанавалі паехаць для высвятлення ў РУУС па адрасе прапіскі.

У выніку муж дзяўчыны адмовіўся ляцець без яе, і іх дваіх знялі з рэйса. Багаж вярнулі, квіткі — не. Адзінае, што ўдалося кампенсаваць, — гэта 100 еўра за спартыўны рыштунак у багажы.

Абмежаванне праз непагашаны плацеж

Паводле слоў беларускі, наступнага дня яна паехала спачатку ў РУУС, а потым у суд. І ў судзе высветлілася, што мінчанка мела абмежаванне на выезд з краіны, якое ёй паставілі яшчэ ў 2020 годзе.

«Мне сказалі, што ў мяне ёсць абмежаванні на выезд і на кіраванне транспартнымі сродкамі, уключаючы нават маторныя лодкі. Прычым праз нейкі плацеж, які быў ужо даўно пагашаны», — расказала дзяўчына.

Пра ніякія абмежаванні мінчанка не ведала, бо, паводле яе слоў, яшчэ летам 2024 года была ў судзе і спецыяльна атрымлівала дакумент, які пацвярджае, што ў яе няма даўгоў і абмежаванняў. Таму не задумвалася, што могуць паўстаць нейкія праблемы.

Аднак выявілася, што інфармацыя ў розных базах даных дзяржорганаў не сінхранізаваная, і ў нейкай з іх старое абмежаванне ўсё яшчэ лічылася. У судзе ёй патлумачылі, што фармальна яна мелася сама падаць заяву на зняцце абмежавання «па справаводстве, пра наяўнасць якога нават не падазравала».

Акрамя таго, мінчанка абураная тым, што не атрымлівала ніякіх апавяшчэнняў пра забарону. «Мне сказалі, што адпраўлялі ліст. Але ён не дайшоў, вярнуўся назад і цяпер проста прышыта да справы. А паўторна высылаць яго не абавязаныя. То-бок калі вы не атрымалі такога паведамлення, то вінаватыя самі».

Самае абсурднае, паводле слоў дзяўчыны, што «абмежаванне на выезд» знялі праз суткі.