Seedstars адабрала 10 стартапаў з беларускімі каранямі для ўдзелу ў венчурнай праграме ЕБРР
Швейцарская кампанія Seedstars адабрала 10 стартапаў з высокім патэнцыялам росту з беларускімі каранямі для ўдзелу ў венчурнай праграме Star Venture Еўрапейскага банка рэканструкцыі і развіцця. Пра гэта кампанія паведаміла ў лінкедзіне.
Вось якія праекты трапілі ў праграму.
- Baby RAIN Technologies — распрацоўвае платформу на базе АІ для ранняй дыягностыкі аўтызму;
- BANTgo — трансфармуе перапрацоўку электронных адкідаў па мадэлі Uber;
- EnergTech Solutions — прапаноўвае разумную воблачную платформу з аналітыкай на базе АІ для энергетычнага рынку;
- Fandy — дапамагае бізнэсам інтэграваць мікраахвяраванні;
- Filmustage — спрашчае вытворчасць фільмаў з дапамогай АІ-платформы;
- Goulash — дапамагае планаваць сталаванне і пакупкі ў лакальных крамах з дапамогай мабільнай праграмы;
- Govar — дапамагае практыкаваць англійскую праз групавыя відэазванкі;
- Plain — дапамагае праектаваць свае прасторы з дапамогай АІ-інструментару;
- Relivent — укараняе інавацыі ў індустрыю мерапрыемстваў з дапамогай AI;
- Tennis ComStat — робіць дэталёвы аналіз тэнісных матчаў з выкарыстаннем AI.
Праграма Star Venture разлічаная на 18 месяцаў. На працягу гэтага перыяду стартапы атрымаюць доступ да індывідуальнай бізнэс-дыягностыцы і кансалтынгавых праектаў, ментараў, інвестараў і ўсіх інструментаў, неабходных для развіцця праектаў.
Seedstars — міжнародная інвестыцыйная і адукацыйная кампанія са штаб-кватэрай у Жэневе. Кампанія інвестуе ў хуткарослыя праекты ў розных рэгіёнах.
Праграма Star Venture ЕБРР накіраваная на прасоўванне інавацыйных стартапаў на ранняй стадыі ў больш як 26 краінах. Для ўдзелу ў праграме адбіраюцца праекты, якія вырашаюць важныя праблемы і маюць патэнцыял для значнага маштабавання.
Star Venture супрацоўнічае з урадамі, акселератарамі, карпарацыямі і іншымі ўплывовымі інвестарамі для стварэння інавацыйных прадпрымальніцкіх экасістэм.
Ад 2019 года Star Venture ЕБРР падтрымала больш за 600 стартапаў у 20+ краінах. За апошнія некалькі гадоў адабраныя стартапы прыцягнулі інвестыцый на суму 420+ мільёнаў долараў.
Читать на dev.by