Playtika ўсё ж забароніць працу з Беларусі. А за рэлакейт добра заплаціць (але не адразу)

Днямі dev.by сталі вядомыя новыя падрабязнасці, са слоў супрацоўнікаў.

На мінулым тыдні топ-менеджмент кампаніі паведаміў, што 30 красавіка — апошні працоўны дзень для ўсіх, хто застанецца ў Беларусі. Пасля гэтай даты доступу да карпаратыўных рэсурсаў з Беларусі не будзе.

Фізічны офіс у Мінску ўжо закрыты для большасці супрацоўнікаў ад пачатку сакавіка. 

Частка каманды разлічвала, што зможа працаваць з Беларусі, дэ-юрэ з афармленнем у Грузіі. Кажуць, на першых мітынгах такі варыянт абмяркоўваўся.

— Але цяпер сказалі, што магчымасць працаваць з Беларусі цалкам скасоўваецца, — расказала крыніца.

Супрацоўнікаў, паводле іх слоў, папрасілі вызначыцца са сваімі планамі — заставацца або з’язджаць з кампаніяй — да 20 сакавіка. 

Рэлакантам дазволяць працаваць з большасці краін. У чорным спісе, акрамя Беларусі, як расказалі крыніцы, «ёсць Расія, некаторыя ўкраінскія гарады, Куба, Сірыя, Ліван, Іран, Паўночная Карэя». 

У нас няма інфармацыі пра тое, колькі супрацоўнікаў мінскага офіса ўжо звольнена/звольніцца, а колькі працягне працу. Анонс закрыцця офіса ў Мінску супаў з новым раўндам глабальных скарачэнняў у Playtika. Медыя паведамлялі, што скароцяць 300-400 супрацоўнікаў у розных лакацыях. Каманда ў Мінску чакала, што працу могуць страціць да 50% офіса (каля 150 чалавек). Як расказала адная з крыніц, у лютым «са многімі інжынерамі завяршылі працоўныя адносіны, выплацілі ім заробак і гадавы бонус». 

Бонусы і дапамога з пераездам

Кампанія, як сцвярджаюць нашы суразмоўцы, прапанавала рэлакантам добрыя бонусы — але з адтэрміноўкай.

Напрыклад, рэлакантам, якія адпрацуюць у кампаніі да канца лета 2024, абяцаюць выплаціць бонус у памеры 4 заробкаў. А тыя, хто адпрацуе да канца красавіка 2025 года, атрымаюць пры канцы бонус у памеры 8 заробкаў.

— Каля месяца таму былі перагляды заробкаў. Цяпер маюць дадаць па 600 долараў да заробку, каб кампенсаваць выдаткі ў іншай краіне, — расказала крыніца.

Паводле слоў крыніцы, кампанія будзе дапамагаць рэлакантам па меры магчымасці, аднак асноўныя пытанні «прыйдзецца вырашаць самастойна». 

— Кампанія будзе дапамагаць з атрыманнем віз, але цяпер з гэтым праблемы не толькі ў Playtika. 

Беларусь сярод фактараў рызыкі

У квартальных справаздачах Playtika Беларусь фігуравала сярод фактараў рызыкі. У фінансавай справаздачнасці за мінулы год Playtika таксама згадала Беларусь у пераліку рызык, «звязаных з міжнароднымі аперацыямі і ўласнасцю».

Кампанія не апублікавала падрабязнай інфармацыі пра даходы ў рэгіёнах/лакацыях. Між тым за мінулы год у Playtika знізілася выручка і чысты прыбытак.

Як вынікае з фінансавай справаздачнасці, за 2023 год кампанія атрымала 2,57 мільярда долараў выручкі. Гэта на 2%, або амаль на 50 мільёнаў долараў менш, чым у 2022 годзе. Выручка кампаніі ўпала ўпершыню за апошнія тры гады. 

У 2024 кампанія не прагназуе значнага росту выручкі і дапускае яе зніжэнне. Playtika чакае, што выручка складзе 2,52-2,62 мільярда долараў. 

Чысты прыбытак Playtika за мінулы год упаў у параўнанні з 2022 амаль на 15% і склаў 235 мільёнаў долараў. 

Таксама стала вядома, што кіраўніцтва Playtika адмовілася ад планаў продажу кампаніі і вырашыла пераарыентавацца на M&A-угоды. Да змены курсу кампанію падштурхнула «бягучая нестабільнасць у Ізраілі і Украіне».

Як паведаміў прэзідэнт і фінансавы дырэктар Playtika Крэйг Абрахамс, у найбліжэйшыя тры гады Playtika на зліццё і паглынанне выдзеліць ад 600 мільёнаў долараў да 1,2 мільярда долараў. Плануецца заключаць па 1-2 ўгоды на год. Топ-менеджар дадаў, што ў кампаніі «ёсць усе шанцы ўзначаліць кансалідацыю ў індустрыі мабільных гульняў».