Каманду скарацілі, праграма для сну — на паўзе. У Loóna новы план

Мабільная праграма для падрыхтоўкі да сну Loóna больш не ў фокусе ўвагі фаўндараў. Стваральнікі MSQRD пераключаюцца на праекты ў пашыранай рэальнасці. Большую частку каманды прыйшлося звольніць.

Вось як пракаментавалі сітуацыю фаўндары Loóna.

— Вялікі патэнцыял на рынку VR/XR/AR, за якім мы актыўна сочым ад 2015 года, анонс цалкам інавацыйных хэдсэтаў Apple Vision Pro і Meta Quest 3, а таксама цяперашняя цяжкая сітуацыя на рынку мабільнага маркетынгу прывялі да перагляду фокусу, сіл і рэсурсаў, — расказалі dev.by у Loóna. — Мы працягваем працаваць і падтрымліваць мабільнае праграму, дапамагаем людзям расслабіцца і пераключыцца. Але стратэгічна робім піват у VR/XR — spatial experiences пад брэндам Loóna з яшчэ большым занурэннем. 

Новыя хэдсэты — гэта пачатак вельмі вялікай гісторыі і руху індустрыі ў бок AR-акуляраў. І мы хочам заняць гэтую нішу са сваёй экасістэмай прадуктаў, захоўваючы прынцыпы, закладзеныя ў брэнд Loóna.

На жаль, такія змены не даюцца без вельмі складаных рашэнняў. Цяпер мы рухаемся ў lean-рэжыме, таму нам давялося расстацца з большай часткай каманды. 

У нас заўсёды працавалі толькі найлепшыя. Так што, калі вы шукаеце, як узмацніцца, можна адкрыць LinkedIn, паглядзець, у каго статус open to work, і без сумневу ім напісаць.

Андрэй Янчурэвіч: «Цяпер фаўндары бачаць пункт росту ў іншай нішы»

dev.by задаў пытанні на ўдакладненне СЕО і кафаўндару Loóna Андрэю Янчурэвічу.

Андрэй, што ўсё ж такі здарылася? 

Прычын для півату некалькі. Адная — стратэгічная. Мы разумеем, што на цяперашнім рынку ёсць добрая магчымасць сысці ў нішу VR/XR і заняць пазіцыю лідара на рынку Mindfulness/Relax/Meditation/Sleep. Іншая — праблемы на рынку мабільнага маркетынгу: калі ў цяперашніх умовах працуеш з paid marketing, то мусіш разлічваць на даволі працяглы перыяд акупнасці.

Якія менавіта праблемы на рынку мабільнага маркетынгу прымусілі зрабіць разварот?

Гэта вядомая агульная праблема. Яна ўзнікла, калі Apple зарэлізіў iOS 15 і SKAdNetwork — ад тых часоў мы паўнавартасна не разумеем, якіх карыстальнікаў купляем. Прыцягваць новых кліентаў стала нашмат складаней і даражэй.

Калі раней тэрміны акупнасці рэкламы былі вельмі кароткія, ад месяца да двух, то цяпер яны падаўжэлі да года і даўжэй.

Гэта ж адбылося не ўчора?

Першыя званочкі з’явіліся ў сакавіку 2021 года, у красавіку выйшла новая iOS, і ад тых часоў рынак моцна змяніўся. Хтосьці змог адаптавацца да яго лепш, хтосьці горш, але ўсе вядомыя мне прадукты ў нашай індустрыі пераходзяць на вэб-лейку. Мы таксама. 

Вэб-лейка — больш складаны і грувасткі працэс: карыстальнік не падпісваецца ў праграме наўпрост праз інфраструктуру Apple і Google — ён спачатку праходзіць анбордзінг у інтэрнэце, там жа плаціць і толькі потым трапляе ў праграму.

Гэта — іншы аўкцыён і іншыя правілы, якія выклікаюць вялікія змены ў камандзе і канцэнтрацыю на іншых рэчах.

Раз вы звольнілі большую частку каманды, значыць, праект мабільнай праграмы Loóna закрываецца?

Не. Паўнавартасны піват азначае поўнае закрыццё прадукту, але мы пайшлі іншым шляхам: пакідаем прадукт, працягваем яго падтрымліваць, паволі дадаем кантэнт, але мы не рэалізуем планы яго развіцця. Калі раней мы трацілі на праграму 100% сіл, то цяпер умоўна 20%. Проста цяпер фаўндары бачаць пункт росту ў іншай нішы, дзе нашыя рэсурсы можна выкарыстоўваць больш эфектыўна.

«Мы не дасягнулі кропкі бясстратнасці»

Якая мадэль манетызацыі ў Loóna? Праграма не выйшла на самаакупнасць?

Манетызацыя — праз падпіску. Не, не выйшла. Былі месяцы, калі мы былі кэш-пазітыў, але на ўсім таймлайне мы не дасягнулі кропкі бясстратнасці.

А ці быў такі план?

Так, мы планавалі выйсці на break-even point у 2024 годзе, але для гэтага спатрэбіліся б дадатковыя інвестыцыі. Гэта дадатковая рызыка. Пасля размовы з калегамі мы вырашылі, што зрабіць піват лепей.

Дык гэта рашэнне фаўндараў ці акцыянераў?

Гэта нашае рашэнне, фаўндараў. Акцыянеры падтрымалі нас у гэтым рашэнні. 

Колькі інвестыцый было ўкладзена ў Loóna і калі былі апошнія?

Суму не буду агучваць. Апошні раўнд быў у 2021 годзе. 

Інвестары аўтаматычна ўбудаваліся ў новы праект?

Гэта ж не новы праект, мы працуем у рамках той жа кампаніі. І кампанія — гэта не толькі юрыдычная асоба, але і асэт, брэнд, людзі, напрацаванае партнёрства. Адная рэч, калі кампанія прымае рашэнне пра закрыццё, усім кажа «да пабачэння» і пачынае іншую гісторыю з іншымі інвестарамі. Але не, гэта не наш выпадак. У нас ёсць місія і вера ў тое, куды мы ідзем. І ёсць падтрымка ад акцыянераў, якая надае сіл і ўпэўненасці. 

«Сон і VR-шлем — рэчы несумяшчальныя»

Раскажы падрабязней пра новыя прадукты. Гэтая гісторыя ж ужо не пра сон?

Сон і VR-шлем у маім разуменні рэчы несумяшчальныя: для сну трэба ляжаць у ложачку, а ў VR-індустрыі ёсць абмежаванні, якія пакуль не дазваляюць гэтага рабіць. Але наш дамен па-ранейшаму Mindfulness & Relaxation. Мы робім імерсіўны экспірыенс. Дагэтуль рабілі гэта ў мабільнай праграме. Цяпер будзем рабіць і для VR/XR-хэдсэтаў.

Колькі чалавек працуе над новым прадуктам?

Нас засталося 9 чалавек, якія працуюць фул-тайм, уключаючы фаўндараў, плюс некалькі чалавек на фрылансе. Так, прыйшлося аптымізавацца, так як крызіс на рынку пераканаўча паказаў: чым даўжэйшая runway, тым эфектыўней ты перажываеш любую стрэсавую сітуацыю.

Мы цяпер вельмі сфакусаваныя. Працаваць з камандай меншага памеру мне як менеджару нашмат прасцей — так эфектыўней выдаткоўваеш свой час. Зусім нядаўна ў нас былі «засэтапленыя» ўсе працэсы і працавалі найлепшыя спецыялісты. Маленькая каманда дапамагае засяродзіцца на самых важных задачах. 

Атрымліваецца, вы вярнуліся ў рэжым ранняга стартапа?

Калі рэліз?

На працягу 7-9 месяцаў плануем выпусціць гатовы прадукт. Але гэта новы рынак са сваімі жорсткімі правіламі, каб патрапіць у стор той жа Meta, трэба адпавядаць пэўным параметрам. Спадзяюся, мы будзем.

Ці ёсць у планах вярнуцца да наймання?

Па меры неабходнасці. Цяпер будзем працаваць максімальна сваімі рэсурсамі. 

Ці спрабуеце прыцягнуць новыя інвестыцыі?

Так, цікавасць праяўляюць і цяперашнія, і новыя інвестары. Апошнія анонсы ад Apple і Meta моцна падагрэлі ўвагу да гэтага рынку. 

«Не было такога, што ўсё працуе ідэальна і раптам мы звальняем»

Наколькі нечаканым было звальненне для двух дзясяткаў вашых супрацоўнікаў і ці ўладкаваліся яны?

У нас у кампаніі даволі празрыстая камунікацыя. Мы стараліся дзяліцца ўсімі навінамі. Магчыма, хтосьці скажа, што гэта стала для яго нечаканым, хтосьці — што чаканым. Дакладна не было такога, што ўсё працуе ідэальна і раптам мы звальняем большую частку каманды. Ну не. 

Тым, каму патрэбная дапамога ў працаўладкаванні, мы спрабуем дапамагчы. Але людзі ўсе досыць скіловыя, я не думаю, што ў кагосьці будуць праблемы з пошукам працы.

А дзе яны?

У асноўным у Польшчы. Яшчэ два гады таму мы прынялі рашэнне пра рэлакацыю каманды. Гэта было вельмі затратна і складана, бо мы дапамагалі на кожным этапе кожнаму сябру каманды. Але я магу з упэўненасцю сказаць, што яно таго было вартае. Гэта паўплывала і на працу, і на культуру ўнутры каманды. 

Атрымліваецца, вы вырашылі, не чакаючы 2024 года, максімальна скараціць каманду, каб расцягнуць пакінутыя грошы на падаўжэй і здолець за іх зрабіць штосьці, што можна прадаць.

Гэта было ўсвядомленае рашэнне, якое дазваляе захаваць кампанію і працягнуць выконваць нашую місію. Я выразна бачу сітуацыю, у якой мы апынуліся з цяперашнім прадуктам на цяперашнім рынку. Я бачу і неверагодную магчымасць на рынку віртуальнай і пашыранай рэальнасці, які ў наступныя два гады вырасце да 300М прададзеных прылад. 

І, калі шчыра, пасля анонсу Quest 3 і Vision Pro мне здаецца, гэтая лічба будзе большай, бо цікавасць толькі расце.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.

«Людзі сталі трывожнейшымі». Як змяняецца рынак праграм для сну і што думаюць дактары

Па тэме

«Людзі сталі трывожнейшымі». Як змяняецца рынак праграм для сну і што думаюць дактары