Падаткавікі ў Польшчы ўзяліся за айцішнікаў
Ім не падабаецца, калі айцішнікі ўжываюць льготу да ўсёй сумы зп і дэ-факта плацяць 6% падаходнага падатку замест 12%.
Падатковая інспекцыя пачала масавыя праверкі ІТ-спецыялістаў на фултайм і айцішнікаў-ІП, піша tvn24.pl са спасылкай на Gazeta Wyborcza.
Тыя, што працуюць на пастаяннай аснове, атрымліваюць лісты з просьбай растлумачыць, чаму яны выкарыстоўваюць 50-працэнтную льготу пры выплаце падаходнага падатку.
Ільгота пры выплаце падаходнага падатку — распаўсюджаная практыка ў польскіх ІТ-кампаніях.
Звычайная стаўка падаходнага для найманых працаўнікоў — 12%, пры гэтым 30 тысяч злотых на год (каля $7К) не абкладаюцца падаткамі (або выплачаныя падаткі вяртаюць), а даходы, якія перавышаюць 120 тысяч злотых на год (каля $28К), абкладаюцца па стаўцы 32%.
Мясцовае заканадаўства дазваляе скарачаць даход, атрыманы ад творчай дзейнасці, на 50% і такім чынам плаціць у два разы менш падатку. Дэ-факта 6% замест 12%, пакуль даход не перавысіў ліміту.
Напісанне кода падпадае пад стварэнне інтэлектуальнага прадукту, аб’екта аўтарскіх правоў.
Але высвятляецца, што на практыцы ўсё не так проста.
Першыя рашэнні падаткавікоў не на карысць айцішнікаў.
Так, кіраўнік ІТ-кампаніі ў мястэчку атрымаў прадпісанне выплаціць пратэрмінаваны падаходны падатак за 52 супрацоўнікаў, якія карысталіся 50-працэнтнай ільготай як стваральнікі аб’ектаў аўтарскіх правоў. Падатковай не спадабалася, што льгота была ўжытая да ўсёй сумы заробку: яна ўсумнілася, што айцішнікі былі занятыя творчай працай 100% працоўнага часу. Бо ёсць яшчэ трэнінгі, мітынгі, іншыя мерапрыемствы, якія нельга аднесці да творчай дзейнасці.
Спецыяліст па падатках Лукаш Башко лічыць, што прынамсі суму ў памеры мінімальнай зп не варта называць аўтарскім ганарарам, а ўлічваць яе як паўнавартасны даход. У адваротным выпадку будуць праблемы з падатковай.
Прэтэнзіі ў падаткавікоў узнікаюць і ў дачыненні да ІП, якія карыстаюцца ільготай IP Box (Innovation Box, або Patent Box). Стаўка падатку ў гэтым выпадку складае ўсяго 5%. Часам ім адмаўляюць у ільгоце, так як ІП не пацвярджаюць, што ажыццяўляюць навукова-даследчую і/або доследна-канструктарскую дзейнасць. Да таго ж ільгота не можа пакрываць увесь даход, атрыманы ад продажу інтэлектуальнага прадукту/паслугі, так як у яго цане будуць выдаткі на матэрыялы ды інш. Рашэнне з такім тэзісам не на карысць падаткаплацельшчыка ўжо вынес Вышэйшы адміністрацыйны суд.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.
І яшчэ крыптой, тут кашалькі.
Дзякуй, што прачыталі гэтае паведамленне.
Читать на dev.by