Як рынак адрэагаваў на перамогу Трампа?

Долар. Долар ЗША значна ўмацаваўся адносна іншых валют. Ён вырас на 1,5% адносна ены, больш чым на 1% адносна еўра і больш чым на 3% адносна мексіканскага песа. Разлічваны ІСЕ індэкс DXY, які паказвае дынаміку долара адносна шасці валют (еўра, швейцарскі франк, ена, канадскі долар, фунт стэрлінгаў і шведская крона), падскочыў на 1,6%, шырэйшы WSJ Dollar Index — на 1, 3%.

Біткойн. Біткойн узляцеў да рэкорднага ўзроўню, перавысіўшы адзнаку ў $75 000. Гэта звязана з чаканнямі змякчэння рэгулявання крыптавалют пры адміністрацыі Трампа. Раней палітык заяўляў пра намер зрабіць ЗША «крыптадзяржавай».

Акцыі. Каціроўкі на асноўныя фондавыя індэксы ў ЗША дадаюць 1,7-2,1%. Банкаўскія акцыі паказалі асабліва добры рост, падняўшыся да 4,4%. У Еўропе асноўныя фондавыя рынкі таксама адрэагавалі станоўча. Германскі DAX і французскі CAC 40 выраслі на 1,2% і 1,77% адпаведна. Акцыі Tesla таксама рэзка выраслі на Франкфурцкай біржы, магчыма, у сувязі з падтрымкай Трампа з боку Ілана Маска. Акцыі Trump Media & Technology Group выраслі на 40%

Аблігацыі. Даходнасць дзесяцігадовых казначэйскіх аблігацый ЗША наблізілася да 4,5%, вярнуўшыся да чатырохмесячнага максімуму. Даходнасць 30-гадовых аблігацый дасягнула 4,6%, што таксама з’яўляецца максімальным узроўнем за апошнія чатыры месяцы. Гэты рух тлумачыцца чаканнямі інвестараў адносна павелічэння дэфіцыту бюджэту ў выніку палітыкі Трампа.

Нафта. Перамога Дональда Трампа выклікала неадназначную рэакцыю на нафтавых рынках. Адразу пасля абвяшчэння вынікаў ф’ючарсы нафты маркі Brent знізіліся на 1,2%, дасягнуўшы $74,63 за бараль, а ф’ючарсы на WTI упалі на 1,1% да $71,17 за бараль. Гэтае зніжэнне звязанае з умацаваннем долара ЗША, што робіць нафту даражэйшай для трымальнікаў іншых валют, а таксама з ростам запасаў нафты ў ЗША, якія перавысілі прагнозы аналітыкаў.

Чаканні інвестараў. Інвестары мяркуюць, што перамога Трампа і рэспубліканцаў у Кангрэсе прывядзе да далейшага зніжэння падаткаў, асабліва з улікам кантролю над абедзвюма палатамі. Кен Пенг, кіраўнік інвестыцыйнай стратэгіі Citi Wealth у Ганконгу, адзначыў, што дэрэгуляванне стане яшчэ адным важным пазітыўным фактарам для эканомікі і рынкаў, асабліва для фінансавага, энергетычнага і тэхналагічнага сектараў.Некаторыя інвестары асцерагаюцца, што палітыка Трампа можа прывесці да аднаўлення гандлёвых войнаў, асабліва з Кітаем.

Нягледзячы на асцярогі некаторых інвестараў, павышэнне тарыфаў разглядаецца як стымул для росту амерыканскай эканомікі. Таксама перамога Трампа на прэзідэнцкіх выбарах можа падтрымаць нафтагазавы сектар ЗША, піша газета Financial Times. У часе перадвыбарчай кампаніі кандыдат ад рэспубліканцаў паабяцаў ануляваць «кожнае рэгулюючае палажэнне з тых, што забіваюць галіну», прынятае адміністрацыяй цяперашняга прэзідэнта Джо Байдэна.