Дакажы, што чалавек. Спрэчны праект стваральніка ChatGPT ідзе ў Польшчу

Гэта павінна, па ідэі, стаць сродкам барацьбы з патокам ботаў і дыпфэйкаў. Але за ініцыятывай пільна сочыць Упраўленне абароны персанальных даных (UODO).

Што за праект

За інавацыйным праектам Worldcoin, які стартуе ў Польшчы, стаяць Сэм Альтман, заснавальнік OpenAI, і Алекс Бланія, кіраўнік кампаніі Tools for Humanity, экс-фізік Інстытута Макса Планка.

У рамках гэтага незвычайнага праекта ў трох лакацыях у Варшаве з’явяцца так званыя «орбы» — срэбраныя футурыстычныя прылады, якія нагадваюць шары для боўлінга. Яны прызначаныя для сканавання вясёлкавай абалонкі вачэй. Узамен людзі атрымаюць спецыяльны лічбавы сертыфікат, што яны людзі, а не боты.

Гучыць абстрактна, але прадстаўнікі Tools for Humanity, кампаніі, што стаіць за Worldcoin, сцвярджаюць, што ў эпоху буму штучнага інтэлекту і ўсё большай няўпэўненасці ў тым, з кім мы маем дачыненне па той бок экрана, гэта свайго роду пашпарт, пацверджанне «чалавечнасці».

Ці легальна гэта?

Атрымліваецца, Польшча стане трэцім рынкам у Еўропе, на якім запусцяць гэты інавацыйны праект. На старце ў Варшаве чакаецца з’яўленне каля дзесяці «орбаў», пры канцы гэтага года сетка будзе пашыраная за кошт дадатковых гарадоў.

Праект, які быў запушчаны ва ўсім свеце мінулым летам і фінансуецца Сэмам Альтманам, ужо працуе, сярод іншага, у Германіі, Аўстрыі, а таксама Паўднёвай Карэі, Японіі, Сінгапуры, Аргенціне, Мексіцы, Перу, Эквадоры, Калумбіі, Чылі і ЗША. Напэўна, яшчэ сёлета да спісу далучацца і іншыя рынкі Цэнтральнай Еўропы.

Усяго ў базе даных ужо зарэгістраваліся 6,5 млн карыстальнікаў амаль з 40 краін. Як тлумачыў «Rzeczpospolita» Караль Хіліманюк з Tools for Humanity, попыт на гэтае рашэнне расце.

Але калі ў Азіі людзі ахвотна скануюць свае вочы, то ў Старым Свеце кампанію трасуць органы абароны персанальных даных. У выніку TfH прыняла рашэнне згарнуць дзейнасць у Іспаніі і Партугаліі, хоць раней у кожнай з гэтых краін верыфікацыю прайшло прыкладна па 0,5 млн чалавек.

Але Караль Хіліманюк сцвярджае, што сумневы еўрапейскіх уладаў рассейваюцца. Так, фірма ўкараніла праверку ўзросту карыстальнікаў (паслуга даступная толькі паўналетнім). І яшчэ рэалізавала магчымасць выдалення сваіх даных з сістэмы.

А бяспечна?

Як даведалася «Rzeczpospolita», Tools for Humanity ўжо праінфармавала Упраўленне абароны персанальных даных аб сваім жаданні пачаць праект на Вісле. Кампанія гарантуе адпаведнасць патрабаванням заканадаўства. 

У прыватнасці, яны працуюць у адпаведнасці з GDPR. А яшчэ, паводле словах Караля Хіліманюка, кампанія ўкараніла рашэнні, якія павышаюць бяспеку карыстальнікаў. 

Так, фота вясёлкі захоўваецца толькі на тэлефоне карыстальніка, пры гэтым біяметрычныя даныя пераўтвараюцца ў унікальны код з адзінак і нулёў, ключ ад якога толькі ў юзера. Прадстаўнік кампаніі падкрэслівае, што звесткі ананімізаваныя і зашыфраваныя, і ніхто, акрамя карыстальніка, не мае да іх доступу.

Нягледзячы на гэта, Упраўленне абароны персанальных даных ужо вывучае праект, і кажа, што выкарыстанне гэтых даных павінна ажыццяўляцца «з асаблівай асцярожнасцю і абачлівасцю».

Ці будзе ўзнагарода?

Людзі, якія прайшлі «верыфікацыю», могуць падаць заяўку на атрыманне лічбавага токена. Гаворка пра валюту Worldcoin (яе бягучы курс складае крыху больш за $1,5).

Уладальнік пашпарта World ID мае магчымасць да канца года атрымаць у агульнай колькасці 57 такіх токенаў.

У TfH сцвярджаюць, што гаворка ідзе не пра збор даных або іх перадачу. Паводле іх слоў, заахвочванне людзей токенамі — гэта сродак для дасягнення неабходнага маштабу праекта.

World ID ужо інтэграваны з Telegram, Reddit, Discord і нават з Minecraft. Больш за тое, Tools for Humanity таксама вядзе перамовы з польскімі стартапамі пра далейшыя рэалізацыі. Паводле даных СМІ, першыя сумесныя праекты павінны запусціць сёлета.