Аддзел навін 19 лістапада 2024, 21:42

У сеціве раскрытыкавалі навагоднюю АІ-рэкламу Coca-Cola

Coca-Cola выпусціла навагодні ролік, згенераваны АІ. Сустрэты ён быў даволі холадна: гледачы назвалі яго «бяздушнымі» і «бясталентным», піша NBC News.

6 каментарыяў

Coca-Cola выпусціла навагодні ролік, згенераваны АІ. Сустрэты ён быў даволі холадна: гледачы назвалі яго «бяздушнымі» і «бясталентным», піша NBC News.

У роліку прысутнічаюць чырвоныя фірмовыя грузавікі, якія курсуюць па заснежаных дарогах, аздобленыя агнямі дамы і белыя мядзведзі ў вязаных шаліках і швэдрах з бутэлькамі напою. Відэа — даніна памяці роліку 1995 года з жывымі акцёрамі і сапраўднымі грузавікамі.

Ролік быў створаны ў некалькіх версіях трыма АІ-студыямі — Secret Level, Silverside AI і Wild Card — пры дапамозе чатырох розных генератыўных мадэляў. Вядома, што рэклама, якая завірусілася, належыць не Silverside AI.

Многія крэатыўшчыкі палічылі вельмі прыкрым, што Coca-Cola выкарыстала штучны інтэлект замест паслуг прафесіяналаў для стварэння відэа. Аўтар анімацыйнага тэлесерыяла «Гравіці Фолз» ад Disney Алекс Хірш заявіў, што «Coca-Cola „чырвоная“, бо складаецца з крыві беспрацоўных мастакоў».

Раней прадстаўнікі творчых прафесій сталі выступаць супраць прымянення АІ у сваёй сферы. Яны асцерагаюцца, што тэхналогія выцесніць жывых супрацоўнікаў. Акрамя таго, яны лічаць гэта амаральным, паколькі мадэлі навучаюцца на змесціве, сабраным без дазволу аўтараў і без пазначэння аўтарства. А гэтым летам Гільдыя акцёраў ЗША пачала страйк супраць кампаній-распрацоўшчыкаў відэагульняў з патрабаваннем павысіць аплату працы.

У Coca-Cola заявілі, што яны ўжо шмат дзясяткаў гадоў займаюцца стварэннем святочнага настрою ў сваіх рэкламных кампаніях, а таксама што яны заўсёды знаходзяцца ў пошуку новых спосабаў прыцягнуць увагу спажыўцоў і не баяцца эксперыментаваць. Сёлета было вырашана звярнуцца да генератыўнага АІ. Кампанія запэўніла, што імкнецца ствараць прадукт высокай якасці на стыку чалавечай творчасці і тэхналогій.