Як ІТ-кампаніі закручваюць гайкі для бэнчу
«Бэнч пераводзяць на 0,5 стаўкі»
Дзе: IntexSoft — Беларусь, Польшча, Германія, Казахстан
— У IntexSoft усіх, хто на бэнчы, пераводзяць на 0,5 стаўкі. Гэта апошнія навіны: такія ўмовы ўводзяцца ад гэтага тыдня і датычацца QA-аддзела. Гэты аддзел агульны на ўсю кампанію, а людзі могуць знаходзіцца ў розных лакацыях. За астатнія аддзелы казаць не вазьмуся, бо не ведаю. Раней бэнч аплачваўся цалкам.
IntexSoft
IntexSoft з’явілася ў Горадні ў 2001 годзе. Цяпер гэта міжнародная кампанія, аўсорсер з офісамі не толькі ў Беларусі, але таксама ў Польшчы, Германіі і Казахстане. На старонцы ў LinkedIn пазначана, што ў кампаніі працуе 300+ супрацоўнікаў.
«Любую актыўнасць на бэнчы можна „логаць“ толькі з дазволу начальства»
Дзе: Twistellar, Беларусь
— Летась у Twistellar быў такі прынцып: на бэнчы ты логаеш час і пазначаеш, чым займаўся, што вучыў, з чым разбіраўся — калі папрасілі зрабіць штосьці новае. Такім жа парадкам мы логалі час, калі доўга чакалі ад кагосьці адказаў, крэдаў.
А цяпер нам забаранілі гэта рабіць. Любая актыўнасць логаецца толькі з дазволу начальства.
Што можна логаць паводле новых правілаў: вы дамаўляецеся з кампаніяй, што менавіта маеце вывучыць і за які прамежак часу. Логаць можна толькі гэта.
Што няможна логаць паводле новых правілаў:
- час чакання адказу ад іншага супрацоўніка (кампанія лічыць, што ты абавязаны гэтыя 15 хвілін вучыцца і ніякіх але!)
- дапамога камусьці
- вывучэнне чагосьці новага ў працэсе (прычым адзін дырэктар лічыць так: калі вучыш штосьці для вырашэння задачы — унось час у тыкет гэтай задачы. Іншы дырэктар: «Чаму гэта сюды ўнесена? Калі ты вучышся — гэта вучоба, а не праца!» І ты нібыта паміж молатам і кавадлам.)
- час, які ты выдаткоўваеш на ацэнку задачы або праверку таго, што робіць твой падначалены джун (на гэта можна адвесці толькі 15 хвілін)
На вывучэнне сертыфіката даецца прыкладна 60-100 гадзін, звычайна даводзіцца сядзець вечарамі, вучыць у вольны час, каб укласціся ў гэтыя часавыя рамкі нават у спакойны час. Калі ў цябе мноства задач з розных праектаў — гэтая лічба змяняецца: для цябе, а не для начальства. У сярэднім на дзень на тое, што не пакрыецца тваімі задачамі, сыходзіць прыкладна 1,5-2,5 гадзіны.
Тэрмінаў, колькі трымаць чалавека на бэнчы, — няма. Калі за супрацоўніка «трымаюцца», то яго пакінуць так надоўга, як спатрэбіцца. Альбо пакуль ён першым не вытрымае — і не сыдзе.
Плацяць як і на праектах. Іншая рэч, што тэрміны павышэння заробкаў, відаць, перагледзелі: ведаю, што людзі падоўгу чакаюць адказаў: ухваляць/не ўхваляць.
Заробак павышаюць прыкладна на $300 раз на 6-9 месяцаў, аднак многія супрацоўнікі баяцца гэтага — так як наўздагон «насыплюць» абавязкаў, якія нельга логнуць: будзеш весці праект, хоць у цябе досведу ўсяго 2 гады; ментарыць джуноў або яшчэ штосьці рабіць, што табе зусім не трэба.
Гэта тычыцца Мінска. У нас ёсць тыя, хто працуе з-за мяжы, але не ў офісе.
Twistellar з’явілася на рынку ІТ у красавіку 2017 года. Займаецца распрацоўкай рашэнняў на базе платформы Salesforce. На сайце кампаніі ў падрабязнасцях распісаны штат: 90+ супрацоўнікаў.
«Заробак на бэнчы захоўваецца, пакуль ёсць заяўкі»
Дзе: Aston, Беларусь
— У Aston, якая «адгалінавалася» ад Andersen, вось як: тэрміны бэнчу невядомыя, нам кажуць, што яны індывідуальныя. Але калі сутыкаешся з гэтым ужо індывідуальна — таксама не дадаюць канкрэтыкі, колькі гэта працягнецца.
Заробак на бэнчы захоўваецца, пакуль ёсць заяўкі — то-бок праекты, на якія цябе можна было б прасумовіць. А далей ты атрымліваеш голы аклад. Некаторых адпраўляюць у неаплачваны адпачынак, нават калі пазіцыі ёсць, спасылаючыся на «складаную сітуацыю».
Яшчэ ў лютым у нас змянілі ўмовы перагляду заробку — цяпер раз на год. А потым да чэрвеня замарозілі бягучыя перагляды.
Aston з’явілася на беларускім рынку ў 2007 годзе. На сайце кампаніі пазначана, што ў яе ў штаце 1100 дасведчаных спецыялістаў. А цэнтры распрацоўкі Aston знаходзяцца ў буйных гарадах Расіі, Казахстана і Беларусі. Іх адрасы ў Мінску, Гомелі, Полацку і Віцебску супадаюць з адрасамі цэнтраў распрацоўкі Andersen. Сама Andersen ад 2022 года засяродзілася на заходніх рынках.
«Альбо пераводзяць на 60% акладу, альбо прапаноўваюць сысці»
Дзе: EPAM, Чэхія
— У чэшскім EPAM ад сакавіка вось такія навіны: ад першага ж дня, як ты апынаешся на бэнчы, цябе альбо пераводзяць на 60% акладу, альбо прапануюць сысці — але з двума акладамі ў кішэні.
Я сам не на бэнчы, усё гэта расказваў мне сябар, які трапіў на бэнч. Нашыя калегі крыху ў шоку ад такога, але сыходзіць цяпер — таксама не варыянт, бо вакансій мала, а людзям трэба яшчэ і дакументамі займацца, калі змяняеш працу.
«Чакалі, што колькасць праектаў павялічыцца, але цуду не адбылося»
Дзе: EPAM, Літва
— EPAM у Літве цяпер скарачае супрацоўнікаў без пераводу на бэнч. Праектаў не стае, на кожную пазіцыю — па 15+ кандыдатаў, таму працаўнікам, якія засталіся без праекта, прапануюць альбо адразу звольніцца з выплатай за 3 месяцы, альбо пераводзяць на 0,5 стаўкі і даюць пару-тройку месяцаў на пошук працы.
Асабіста мне прапанавалі на выбар:
- альбо я вывучаю на працягу месяца новую тэхналогію — і спрабую прайсці асэсмент (і ў выпадку поспеху зноў адпраўляюся на бэнч, пакуль мне не падбяруць новага праекта, а ў выпадку няўдачы — сыходжу);
- альбо мы ўзгоднім дату звальнення, і мяне не будуць чапаць месяцы два — я буду спакойна займацца пошукам працы ў іншай кампаніі.
Вакансій мала яшчэ ад студзеня, бэнч вялікі — і сітуацыя не мяняецца. Чакалі, што ў другім квартале колькасць праектаў павялічыцца, але цуду не адбылося.
Кампанія заснаваная ў 1993 годзе. Гісторыя ў галоўных датах, лічбах, угодах, праектах — тут. 4 гады таму штат беларускай EPAM — гэта прыкладна 1/5 усіх айцішнікаў краіны (10 тысяч супрацоўнікаў). Аднак пры канцы 2022 года ў Беларусі працавала ўжо 4,5 тысячы чалавек. Актывы ў Расіі EPAM выставіў на продаж.
У 2021 годзе EPAM увайшоў у топ-100 найлепшых кампаній ЗША, паводле версіі часопіса Nesweek. Тады ж кампанія ўвайшла і ў топ-3 ІТ-кампаній Літвы па заробках і топ-20 айцішных працадаўцаў. А яшчэ гэта падаткаплацельшчык № 1 у літоўскім ІТ.
«Скарачаюць людзей на бэнчы»
Дзе: Softeq, Польшча, Літва, Мексіка
— Softeq скарачае 60 чалавек — пра гэта гаварылася ў лісце, што даслалі супрацоўнікам мінулага тыдня. У Беларусі ў нас ліквідавалі офіс, а ў Літве, Польшчы і Мексіцы — звальненні. Умовы звальнення ва ўсіх індывідуальныя: хтосьці змог старгавацца на выплаты; а тыя, хто па B2B-дагаворах у Польшчы аформленыя, — атрымалі апавяшчэнне за 2 тыдні, і ўсё.
Паводле слоў менеджараў, на бэнчы ў кампаніі застаецца яшчэ каля 50 чалавек.
Пры гэтым умовы бэнчу не мяняліся: заробак захоўваецца, рамак па часе няма — сядзіш, пакуль не знойдуць табе праекта.
Softeq Development заснаваная ў 1997 годзе. Штаб-кватэра кампаніі знаходзіцца ў Х’юстане, штат Тэхас. У 2008 годзе Softeq адкрыла ў Мінску цэнтр распрацоўкі — «Софтэк Дывелапмент». Там займаюцца распрацоўкай софту і «жалеза» на заказ.
Мінскі офіс, паводле інфармацыі супрацоўнікаў (яны спасылаюцца на заявы кампаніі на агульных мітынгах), хочуць ліквідаваць. Пакуль, паводле даных адзінага дзяржрэгістра, «Софтэк Дывелапмент» — дзейная кампанія. Пры гэтым на сайце Мінска няма ў спісе лакацый.
А як у вас? Пішыце ў каментарах!
Вы дачыталі гэты матэрыял да канца. Калі вы тут апынуліся, значыць, хутчэй за ўсё, вас штосьці зачапіла. Выдаткуйце яшчэ 30 секунд, калі ласка.
Беларускае ІТ нельга ўявіць без dev.by.
Мы ўжо амаль 15 гадоў робім важныя і сумленныя матэрыялы, дапамагаем кожнаму з вас дзяліцца прафесійным досведам і думкамі, робім беларускую версію. Мы радаваліся поспехам індустрыі разам, звярталі ўвагу на несправядлівасць, даем слова кожнаму.
Сёння рэдакцыя dev.by — каманда аддаленых беларусаў з 10 чалавек. Яшчэ ў нас ёсць менеджмент, бэкофіс і, вядома, тэхнічныя спецыялісты. У нас 600+ тысяч чытачоў штомесяц і дзясяткі тысяч у тэлеграм-каналах і сацыяльных сетках. Мы выпускаем 300+ навін і вялікіх тэкстаў, накшталт таго, што вы толькі што чыталі. Усе беларускія медыя цытуюць dev.by.
Ва ўсіх цёмныя часы. І мы ідзем праз ідэальны шторм разам з кам’юніці. Нашыя рэкламныя даходы, якія былі крыніцай фінансавання рэдакцыі, скараціліся ў некалькі разоў.
Пры гэтым мы ўпэўненыя, што тым больш важна працягваць заставацца месцам сустрэчы беларускай ІТ-супольнасці — усіх, хто застаецца і з’язджае.
Вы можаце нам дапамагчы. Пры канцы мінулага года мы запусцілі падпісную кампанію — пачалі збіраць данаты ад чытачоў. Мы хочам у 2023 сабраць 1000 чытачоў-падпісчыкаў. Цяпер іх 170.
Дапамагчы нам можна праз Patreon.
І яшчэ крыптой, тут гаманцы.
Цяпер сярэдні чэк — каля 10$, але мы радыя любой суме. Штомесячныя плацяжы робяць нашыя планы больш прадказальнымі, але вы самі глядзіце, як вам зручна :)
Дзякуй, што прачыталі гэтае паведамленне.
Читать на dev.by