Геаграфія — ад Літвы да Аргенціны. Беларусы запусцілі клуб для фаўндараў-качэўнікаў
У лістападзе ў рамках Web Summit у Лісабоне адбылося адкрыццё новага міжнароднага кам’юніці для заснавальнікаў стартапаў — f27.club. Расказваем пра клуб, «які аб’ядноўвае беларускіх фаўндараў незалежна ад іх лакацыі».
f27.club называе сябе глабальнай супольнасцю прадпрымальнікаў з беларускімі каранямі незалежна ад іх месца знаходжання. Заснавальнікі — беларусы-рэлаканты Аляксандр Шугаеў (жыве на Кіпры) і Рэй Світла (яго таксама знаюць як Змітра Леўкаўца, жыве ў Лісабоне).
Вось як расказвае пра стварэнне клуба адзін з сузаснавальнікаў.
— Мы з Аляксандрам Шугаевым пазнаёміліся ў Кіеве ў 2020 годзе, калі я працаваў над стартапам WAKA, а Аляксандр быў кафаўндарам венчурнай студыі Rocket DAO. Там нават абмяркоўвалі ідэю фізічнага хаба для беларускіх стартапаў. Але жыццё ўнесла свае карэктывы: вайна, эміграцыя. Мы зразумелі, што ідэя супольнасці не страціла актуальнасці і запусцілі f27.club як анлайн-клуб, які аб’ядноўвае беларускіх фаўндараў незалежна ад іх лакацыі.
Чым яшчэ займаюцца фаўндары
— Сёння Аляксандр дапамагае партфельным кампаніям як адвайзер і развівае партнёрства ў Atleta Network, — кажа Рэй. — Я займаюся платформай FutureState.tv, гэта медыя, івэнты і даследаванні пра будучыню тэхналогій і civil tech.
Дарэчы, чаму Рэй Світла?
— Так, у Мінску і Кіеве мяне многія зналі як Змітра, змена імя — гэта эксперымент і спосаб адаптацыі да новых умоў жыцця, — кажа Рэй. — У мяне ёсць пост пра гэта ў сацсетках.
Што будзе рабіць клуб і як туды патрапіць
Супольнасць f27.club заяўляе пра сябе як пра гарызантальную структуру, дзе кожны ўдзельнік выступае адначасова як ментар і як сябра супольнасці.
— У кожнага ўдзельніка ёсць экспертыза, якой ён дзеліцца (у фандрэйзінгу, маркетынгу, распрацоўцы, хайрынгу і г. д.), і ён атрымлівае дапамогу калег у той вобласці, дзе яна яму патрэбная, — тлумачыць Рэй.
Цяпер уступіць у кам’юніці запрашаюць бясплатна, для гэтага трэба запоўніць анкету на сайце. Фаўндары плануюць адабраць 60 удзельнікаў праграмы, разлічанай на 12 месяцаў. Ужо адабрана 35 удзельнікаў.
— Мы таксама разглядаем магчымасць павелічэння колькасці ўдзельнікаў да 100, — кажа Рэй. — Фаўндары пражываюць у Партугаліі, Іспаніі, ЗША, на Кіпры, у Францыі, Аргенціне, Польшчы, Літве і ў іншых краінах. Мы імкнемся ахапіць невідавочныя месцы, дзе ў беларускіх прадпрымальнікаў менш падтрымкі і нэтворку. Дэдлайну падачы заявак няма, аднак мы рэкамендуем падаваць заяўку як мага раней.
Чаму праграма абмежаваная годам, калі супольнасць пастаянная?
— Планаваць працу на год прасцей — гэта дазваляе паставіць выразныя мэты і KPI, а затым ацаніць эфектыўнасць клуба і яго фарматаў, — тлумачыць Рэй. — Гэта не супярэчыць ідэі f27.club як пастаяннай супольнасці. Наадварот, такі падыход дапамагае зразумець, якія элементы працуюць, што патрабуе паляпшэння і як далей развіваць клуб.
Што ў праграме
Абяцаюць розныя фарматы ўзаемадзеяння: peer-to-peer сесіі, мастермайнды, вэбінары, пітч-сесіі і афлайн-мерапрыемствы. Вось, напрыклад, што ў планах на найбліжэйшыя месяцы:
— Peer-to-peer сесіі — кожны тыдзень. Падбіраюцца пары фаўндараў для знаёмстваў, абмеркавання агульных выклікаў і абмену вопытам. Гэта фармат для стварэння сувязяў унутры клуба.
— bi-weekly званкі — раз на два тыдні. Абмеркаванне запытаў, знаёмства з пачаткоўцамі, адаптацыя праграмы пад бягучыя патрэбы.
— Варкшопы (інтэрактыўныя сесіі):
- How to Find a Sense of Home as a Founder in Exile — адкрыты дыялог з Юрыем Вядзеніным.
- From $25M Raised to $100M+ Term Sheets: Strategies and Live Deck Reviews — сесія з Ганнай Мастыкінай і разбор пітчдэкаў.
- Founder’s Personal Brand and PR for Attracting Investments — сесія з Антанінай Брадовіч.
- Варкшоп па Product Market Fit ад Сальміны Сасі.
За чый кошт праект
Праект называе сябе некамерцыйным. Пры гэтым у яго ёсць партнёры, напрыклад, Pyxera Global, якая ў рамках праграмы USAID дапамагае пакрываць базавыя выдаткі і забяспечвае рэсурсы для развіцця.
Акрамя таго, у партнёрах клуба PR-агенцтва Around (дапамагае ўдзельнікам клуба выходзіць на новыя рынкі), венчурныя фонды і бэнды.
Хто з вядомых фаўндараў далучыўся да f27.club
Андрэй Аўсіевіч (ex-Pinterest, Farfetch, ServiceNow), Ганна Лазіцкая (ex-SplitMetrics), Ягор Дуброўскі (сузаснавальнік Filmustage), Ганна Мастыкіна (ex-AltaIR Capital).
Акрамя таго, f27.клуб атрымаў падтрымку Ultra.vc, Angels Band, Verras Capital, Dobra Ventures, Around PR Studio.
Читать на dev.by