Аддзел навін Стартапы 13 ліпеня 2023, 12:51

Беларус сабраў стартап-гід у Notion. Мае дапамагчы прыцягнуць грошы «10Х хутчэй»

Абяцае суперэканомію часу навучання і хуткасці атрымання даходу.

Беларус Павел Прата выпусціў на ProductHunt дапаможнік для заснавальнікаў стартапаў з роўдмэпам прыцягнення інвестыцый.

Прадукт пад назвай VC Sandbox ён прэзентуе як «10+ гайдаў, 50+ шаблонаў, спіс з 30 000+ інвестараў і найлепшыя лайфхакі ад тэхналагічных лідараў, такіх як YC, Ramp, Loom і Carta». Доступ да мануала каштуе $99.

— Я — Павел, — называецца аўтар VC Sandbox. — Я працую ў сферы венчурнага капіталу больш за 5 гадоў, дапамагаючы фаўндарам ствараць прадукты і збіраць сродкі. І кожны раз, калі мы даходзім да фандрайзінгу, мяне закідваюць пытаннямі. «Гэй, а што тут не так з пералікам умоў?» або «Як пісаць „халодныя“ імэйлы, каб была канверсія?» А потым ідзе класічнае пытанне: «Ці ведаеце вы якіх-небудзь інвестараў, якія б далучыліся да раўнда?».

Я стаміўся ад гэтага. Заснавальнікі таксама. І таму я вырашыў гэта змяніць! Я выдаткаваў больш за шэсць месяцаў на збор усіх матэрыялаў і найлепшых практык, якія дапамаглі заснавальнікам падняць грошы, і сабраў іх на адной старонцы Notion.

Пад капотам, акрамя ўжо пералічанага, Павел абяцае:

— гласарый са 120+ тэрмінамі;

— спіс з 70+ інструментаў для фандрайзінгу;

— спіс з 15+ курсаў і 30+ кніг па VC;

— 5 сімулятараў фандрайзінгу і г. д.

Яшчэ абяцае, што мануал дапаможа зэканоміць 1000+ гадзін на саманавучанні і прыцягнуць інвестыцыі ў 10 разоў хутчэй.